«Медицина адамдарды, ветеринария адамзатты емдейді» демекші, мал дәрігерлерінің түрлі жұқпалы инфекциялық ауруларға қарсы тұру әдістерін қамтыған семинар мамандарға өте пайдалы болды. «GREEN Which» қонақүйінің залына жиналған мамандар өздері біле бермейтін әдістермен танысып, БҰҰ өкілдеріне көптеген сұрақ қойды. Сонымен бірге өздерінің сақтану шараларын толық біле бермейтіндіктерін байқады. Мысалы, сібір жарасы болуы мүмкін деген малдың өлексесін біздің ветеринарлар сойып, сынамасын зертханаға апаруға тырысады. Бірақ мұндай аурудан өлді делініп күдіктенген малдың өлексесін союға мүлде болмайды екен. Тек жығылған жағындағы құлағын кесіп алып, ішінде дезинфекциялық ерітіндісі бар пергаменттік қалташаға салып, оны тығыз жабылған ыдыспен ғана зертханаға жіберген дұрыс көрінеді. Құлақ кесілген жерді инфекция тарамас үшін міндетті түрде күйдіру керек екен.
Сондай-ақ сынама зертханаға бір тәуліктің ішінде жеткізілгенде ғана нәтиже береді. Сынаманы қатырудың да қажеті жоқ. Жұмыс барысында мал дәрігерінің үстінде халат, екі қабат бес саусақты қолғап болуы міндет.
Сондай-ақ БҰҰ мамандары жануарлар мен құстардан қан алудың озық тәсілдері туралы да айтты. 5-10 мм қанды таңғы мезгілде, жануарларға әлі жемазық берілмеген уақытта алу керек. Денеден қан алынатын жердің жүні қырылады, терісіне дезинфекция жасалады. Қан түтікшеге ағуы шарт, егер тамшылап алынса нәтиже дұрыс болмайды.
Мамандар ғана білуге тиісті осындай шарттар туралы көп айтылды. Тренингтің тәжірибелік бөлігі М.Әуезов көшесінде орналасқан «Провиант Групп дистрибьюшн» ЖШС мал сою алаңында тірі және сойылған мал мен құстан сынама алу әдістерін көрсетумен жалғасты.
Семинар-тренингтің басты мақсаты – зертханалық диагностика үлгілерін жинау, орау, тасымалдау, өңдеу тәжірибесін жетілдіру арқылы сібір жарасы, бруцеллез, құс тұмауы, пастереллез сияқты қауіпті аурулардың алдын алып, эпидемиологиялық қадағалауды қамтамасыз ету.
Кәсіби тренингтің негізгі бөлімі теориялық оқытуды, практикалық тәжірибені, кәсіби дайындықты нығайтуды қамтиды. Қатысушылар сынама алудың ұлттық, халықаралық стандарттарымен танысып қана қоймай, үлгі сапасын сақтаудың озық әдістерін үйреніп, биологиялық қауіпсіздік стандарттары шараларын үйренді. Сондай-ақ аса қауіпті үлгілермен жұмыс істеуге дағдыланып, зооноздық инфекциялардың өршуін болдырмаудың тиімді мүмкіндіктеріне машықтанды. Кешенді тәсіл тек теориялық білім ғана емес, сонымен қатар ақпаратты тәжірибемен бекітуге мүмкіндік беріп, мамандардың эпидемиологиялық сын-қатерлерге жылдам әрекет етуге дайындығын айтарлықтай арттырды.
Солтүстік Қазақстан облысы
