Фото: «Қазақстан халқына» Қоғамдық қоры
Болат Жәмішев бұл қызметке 2022 жылдың қаңтар айында тағайындалған. Ол өкілеттік мерзімінің аяқталуына байланысты Қордағы жұмысын аяқтау туралы шешім қабылдаған.
Айта кетейік, Болат Жәмішев Қордың қалыптасуы мен дамуына зор үлес қосты. Қор 104 қайырымдылық бағдарламасы мен жобасына бастамашы болып, оның 62-сін іске асырды. 29 қаңтарда ҚР Президенті жанындағы Орталық коммуникациялар қызметі алаңында Қор Басқармасының мүшелерінің қатысуымен өткен брифингте «Қазақстан халқына» қорының жұмыс нәтижелері туралы баяндаған.
«Қорда жұмыс істеу мен үшін үлкен мәртебе және жауапкершілікті іс болды. Қор қызметінде біздің бастамаларымызды қолдағандардың барлығына шын жүректен алғыс айтамын. Біз бірігіп айтарлықтай нәтижелерге қол жеткіздік және Қордың жаңа басшылықпен өз дамуын жалғастыра беретініне сенімім мол. Барлық серіктестерге, донорларға және қызметкерлерге ортақ игі ісімізге қосқан үлесі үшін алғыс айтамын», деді Болат Жәмішев.
«Қазақстан халқына» Қоғамдық қоры Қамқоршылық кеңесінің шешімімен басшы лауазымына Лаззат Шыңғысбаева сайланды. Ол 2025 жылдың 1 ақпанынан бастап қызметіне кіріседі.
Айта кетейік, Л.Шыңғысбаева бұған дейін «Қазақстан халқына» қоры Басқарма төрағасының орынбасары қызметін атқарып, мемлекеттік награда – «Ерен еңбегі үшін» медалімен, «Атамекен» ҰКП құрметті қызметкері» медалімен марапатталған.
