Сурет: invest.gov.kz
Биылғы форум 4 негізгі бағыт аясында жұмыс істейді: сыртқы саясат және халықаралық қауіпсіздік, халықаралық даму және тұрақтылық, энергетика және климаттың өзгеруі, экономика және қаржы. Аталған бағыттар шеңберінде жетекші әлемдік саясаткерлер, бизнес көшбасшылары және қоғам қайраткерлері пікірталасқа қатысып, көзқарасын жеткізеді.
Сонымен қатар көпполярлы әлемдегі орта державалардың саясаты, Орталық Азиядағы су қауіпсіздігі, жасанды интеллект дәуіріндегі интеллектуалдық қазына тақырыптары да талқыға өзек болмақ. Әрине, бұл орайда энергетикалық қауіпсіздік, климат өзгерісімен күрес, геосаяси ынтымақтастық, халықаралық сауда, технологиялық инновация, орнықты даму тақырыптары да назардан тыс қалмайды.
«Әлем бұрын-соңды болмаған жаһандық күрделілік дәуіріне қадам басты. Осындай кезеңде AIF 2025 алаңы – пікір мен нақты әрекеттің түйіскен жері. Бұл – поляризацияны еңсеріп, бірлескен дамудың ортақ жолын айқындайтын платформа. Біз саясат, бизнес және ғылым салаларындағы ең озық ойлы әрі жаңашыл көшбасшылардың басын қосамыз.
AIF 2025-тің басты міндеті – көпжақты ынтымақтастықты қайта жаңғырту, түбегейлі диалог орнату және ең өзекті жаһандық мәселелерді шешуге бағытталған нақты қадамдарды ұсыну», делінген ұйымдастырушылар мәлімдемесінде.
