«Silense» би театрының негізі 2004 жылы қаланған. Ұжым 2023 жылы жаңа форматта жанданды. Сол кезден бастап талапты қыздарды Мәдениет саласының үздігі, хореограф Ботагөз Тұрлыбекова дайындап жүр.
«Бұл би театрында тек құлағы нашар еститін жандар билейді. Алғашында бұл топқа конкурстар үшін ғана би қойып жүрдім. Сол байқаулардан ылғи да жүлделі орындармен оралды. Қыздармен жақын таныса келе ішкі жан дүниесін түсініп, биге деген құштарлықтарының биік екенін байқадым. Жетекшілік ету міндетін мойныма алып, топ алдына маңызды межелерді бекітіп, етене іске кірісіп кеттік», дейді Ботагөз Серікқызы. Ол ерекше қыздармен түсінісу үшін мақсатты түрде ым-ишара тілін де меңгерген.
«Әдетте би үйреткенде образ арқылы, тілмен суреттеп жеткіземіз. Оларға оны айта алмайтын болғандықтан ым-ишара тілін қолдану керек. Балалардың жанын терең түсіну үшін осы тілді арнайы курсқа барып үйреніп шықтым. Асылында, биді қимыл мен ишара құрайды. Сондықтан аса кедергі жоқ. Кейде менің қателескен тұсымды қыздар толықтырып, тілсіз-ақ түсінісіп келеміз», дейді хореограф маман.
Қыздар аптасына үш рет шеберлігін шыңдайды. Талмай еңбек ете жүріп қоржындарын 9 би қойылыммен толықтырған. Оның төртеуі ым-ишараға негізделген.
Олардың өзара ұйымшылдығы мен бір-бірін қолдауы да әрдайым жеңіс тұғырынан табылуға септесіп жүр. Би ұжымы Орал қаласында өткен «Сізді биге шақырамыз» атты республикалық би байқау-фестивалінде Ұлттық би аталымы бойынша Гран-при, заманауи би аталымы бойынша ІІІ орынды иеленген. Сондай-ақ Астанада ұйымдастырылған «Mega-Star» шығармашылық байқауында «Бас жүлдені» жеңіп алып, Германия, Египет сахналарында өнер көрсетуге жолдама алған. Шектеулі мүмкіндік шекарасын кесіп өткен «Silense» би театры сау балалар арасында да топ жарып жүр.
Ерекше жандарды биге баулу «би-қимыл терапиясы» деп аталады. Мұнда би арқылы жанды емдейді. «Silense» би театрының мүшесі Аружан Асқарова ұстаздары бұл міндетті үнсіз ұғынып жүргенін жеткізді.
«Ұстазымыз өте мейірімді адам. Бізді қиындықта қалдырған емес. Әрдайым шабыттандырып, алға ұмтылдырады. Осындай қарым-қатынасына қарымта ретінде қыздар да қарап қалмай барын салады», деді ол.
