Суретті түсірген – автор
Таң балалар үшін көңілді басталды. Жылдам қимылдайтын арнайы жасақ (ЖҚАЖ) қызметкерлері әсерлі көрсетілім ұйымдастырып, қызметтік иттермен жұмыс істеу дағдыларын, арнайы дайындық элементтері мен қылмыскерлерді ұстау тәсілдерін көрсетті. Балаларға полиция автокөліктері мен тәртіп сақшыларының арнайы жабдықтарымен жақын танысу ерекше қызық болды.
Көрсетілімнен кейін балаларға тәтті сыйлықтар табысталды. Кейін олар полиция қызметкерлерінің сүйемелдеуімен лагерьге қызықты сапарға аттанды. Лагерьге келгенде оларды тәлімгерлер мен қызметкерлер жылы жүзбен қарсы алып, лагерь аумағымен таныстырып, эстафеталар, спорттық ойындар мен шығармашылық байқаулар ұйымдастырды.
Іс-шараның ең әсерлі сәттерінің бірі Полиция департаментінің бастығы генерал-майор Ерлан Омарбековтің келуі болды. Нағыз генералмен жүздесу балаларға үлкен әсер қалдырды. Олар құрметпен қарсы алып, сұрақтар қойып, бірге суретке түсті.
– Бүгінгі күн біздің ең қымбат, ең сүйікті кішкентай азаматтарымызға арналады. Әрбір бала өзін қауіпсіз сезініп, жанында әрдайым қолдау мен қамқорлық көрсететін ересектер бар екенін білсе екен дейміз. Бұл – бәрімізге ортақ міндет, – деді Ерлан Омарбеков балалармен әңгімесінде.
Мереке жарқын күлкімен, шаттыққа толы сәттермен және алғысқа толы жүрекжарды тілектермен аяқталды. Бұл күн балалар үшін тек қызықты оқиға ғана емес, ересектер тарапынан көрсетілген қамқорлық пен мейірімнің, қолдаудың маңыздылығын еске салған мәні зор іс-шара болды. Мұндай іс-шаралар жай ғана демалыс емес, әрбір баланың өз өмірінің қауіпсіз екеніне сенімді болып, өзін қажет әрі сүйікті сезіну үшін жасалған жарқын әрі игілікті қадам.
Шығыс Қазақстан облысы
