Дөңгелек үстелге еліміздің жетекші медицина мамандары, мемлекеттік орган өкілдері, психикалық денсаулық саласындағы сарапшылар мен қоғам белсенділері қатысты. Келелі кеңесте Республикалық психикалық денсаулық ғылыми-практикалық орталығының бас директоры Алтынай Есқалиева шизофренияны басқарудың жолдарын айтып берді.
«Шизофрения – күрделі, бірақ басқаруға болатын дерт. Егер ауруды ерте анықтап, уақтылы емдесе, науқастың өмір сапасы айтарлықтай жақсарады. Емнің негізі – антипсихотикалық препараттар. Сонымен қатар когнитивті-мінезқұлықтық терапия, психоәлеуметтік қолдау, жұмысқа орналасуға көмектесу, бейімдеу тренингтері мен отбасының қатысуы науқастың толыққанды өмірге оралуына сеп болады. Қоғам тарапынан түсіністік пен қолдау пациенттердің бейімделуінде шешуші рөл атқарады», деді А.Есқалиева.
Дүниежүзілік денсаулық сақтау ұйымының мәліметінше, шизофрения жаһанда 24 миллионнан астам адамда кездеседі. Яғни шамамен әрбір 300-адам, ересектер арасында әрбір 222-адам осы диагнозбен өмір сүреді. Елімізде шизофрениямен ауыратын 40 мыңнан астам адам бар. Ауру белгілері әдетте 20–29 жас аралығында байқалып, адамның ойлау жүйесіне, эмоциясына, әлеуметтік қарым-қатынасына, жалпы өмір сапасына кері әсерін тигізуі мүмкін. Ғалымдар шизофренияның пайда болуына генетикалық бейімділік, қоршаған орта әсері, психоәлеуметтік факторлар ықпал етуі мүмкін екенін айтады. Көпшілікке шизофрения өмірді түбегейлі өзгертіп жіберетін ауыр үкім сияқты көрінуі мүмкін. Алайда медицинаның дамуы мен заманауи емдеу тәсілдерінің арқасында бұл дертпен өмір сүруге болатыны дәлелденді. Дұрыс ем мен тұрақты бақылау жүргізілген жағдайда науқастардың кемінде үштен бірі тұрақты ремиссияға жетіп, қалыпты өмір сүре алады.
«Стереотипсіз психикалық саулық» ұранымен өткен жиын – елімізде психикалық саулыққа деген көзқарасты өзгертуге бағытталған маңызды қадамдардың бірі. Ашық әңгіме, сапалы медициналық көмек, қолжетімді ақпарат, қоғам тарапынан қолдау – бұл мәселеде басты құрал. Медициналық көмек сапасы жақсарса, саланы ілгерілететін бастамаларды қоғам қолдаса ғана оң нәтижеге қол жеткізуге болады.
Кәмила ТАЙТӨЛЕУ,
Л.Н.Гумилев атындағы ЕҰУ-дың 3-курс студенті
