Сурет: gov.kz
Мәдениет және ақпарат министрлігі Жастар және отбасы істері комитетінің қолдауымен, «Жастар» ғылыми-зерттеу орталығының бастамасымен қолға алынған бұл жобаға екі жыл болды. «JastarX» алаңында азаматтар белгілі бір тақырып төңірегінде өз ойын еркін айтып, елдің дамуына негіз болатын оңтайлы шешімдерді ұсынады.
Маусымның алғашқы жүздесуі «Жаңа буынның құндылықтары: уақыт көрінісі» тақырыбына арналды. Басқосуда жастар ғалымдармен бірге қазіргі қоғамдағы олардың рөлі, жаңа әлеуметтік стратегияларды қалыптастыруға қосар үлесі секілді маңызды мәселелерді талқылады.
Бұған қоса жиында «Тіл-Қазына» ұлттық ғылыми-практикалық орталығының өкілі Әйгерім Серікжанова қазақ тілін цифрландыру жобасын таныстырып, жасанды интеллект негізіндегі TilQazyna LLM тілдік моделін көрсетті. Бұл инновациялық өнім қазақ тілінің лексика, морфология мен семантиканың тағы басқа саласында, оның ішінде қазақ тілінде мәтінді генерациялау, перифраз жасау, контекспен жұмыс істеу, ықшамдау, сондай-ақ грамматикалық және пунктуациялық қателерді түзету, фразеологизмдердің мәнін ашу, терминдерді аудару сынды тапсырмаларды орындайды.
Ал «United Central Asian Professionals» жобасының үйлестірушісі және Назарбаев университетінің ғылыми көмекшісі Аружан Капарова жастардың климаттық дағдарысты еңсерудегі рөліне назар аударды. Оның айтуынша, жас ұрпақ күн тәртібіндегі экологиялық мәселелерге белсенді араласып, климаттың өзгеруі салдарларының күшеюін ескере отырып, орнықты болашақты қалыптастыруға үлес қосуға тиіс.
Өз кезегінде «Жастар» ҒЗО әлеуметтанулық зерттеулер және болжау басқармасының жетекшісі Сабина Шаймерденова жастардың негізгі құндылықтары жөніндегі кейінгі зерттеу нәтижелерімен бөлісті. Анықталғандай, қазіргі жас буын үшін басты құндылықтар қатарында отбасы, денсаулық және тұрақтылық маңызды. Сондай-ақ сауалнама барысында мамандар жастардың цифрлық технологияларға жоғары қызығушылығын және әлеуметтік желілердегі ерекше белсенділігін байқаған.
Кәмшат ТӨЛЕГЕНОВА,
Л.Н.Гумилев атындағы ЕҰУ-дың 2-курс студенті
