Таяуда іске қосылатын жаңа өндіріс қаптама өнімдерінің өзіндік құнын төмендетуге, жүздеген жаңа жұмыс орнын ашуға және отандық шикізат базасын дамытуға мүмкіндік береді.
«Гофротара» ЖШС директоры Гүлнар Қайдарованың айтуынша, компания өндірістік қуатын тұрақтандыру мақсатында макулатураны өзі өңдеуге бел буған.
– Импорттық шикізат бағасы құбылған сайын өнімнің өзіндік құны да өседі. Ал жаңа зауыт шикізатты өзіміз өндіруге жол ашады. Бұл – стратегиялық шешім. Оны жергілікті билік те қолдап отыр, – деді ол.
Жоба арнайы экономикалық аймақта жүзеге асырылып жатыр. Ол «Даму-Өндіріс» өңдеуші өнеркәсіпті қолдау бағдарламасы және «Бизнестің жол картасы – 2025» мемлекеттік бағдарламасы аясында қаржыландырылуда.
Компания өкілдері жобаны дайындау кезінде Қытай мен Түркиядағы озық тәжірибені зерттеген. Бұл елдерде сапаны бақылау толық автоматтандырылған.
– Автоматтандырылған жүйе қағаз полотносының қалыңдығы мен тығыздығын мыңдаған нүктеде тексереді. Мұндай жабдық болашақта өндірілетін картонның жоғары сапасын қамтамасыз етеді, – деп толықтырды кәсіпорын басшысы.
Қазіргі таңда жұмыс істеп тұрған зауыт ай сайын 1,2 млн шаршы метр гофрокартон шығарады. Оның қуаты – 2 млн шаршы метр. Ал жаңа зауыт іске қосылған соң жылына 60 мың тонна макулатура өңделмек.
Павлодар картондары тамақ өнеркәсібінен бастап медицинаға дейін түрлі салада кеңінен қолданылады. Өндіріс толығымен автоматтандырылған: көп түсті баспа (CMYK стандарты), кесу, қалыппен шабу және желімдеу процесі цифрлы жүйемен басқарылады. Өнімдер еліміздің түкпір-түкпіріне жеткізіледі.
Өндірістік цех басшысы Евгений Сининнің айтуынша, отандық шикізатты қолдану компанияның ішкі және сыртқы нарықтағы орнын күшейтеді.
– Қазір еліміздегі макулатураның басым бөлігі шетелге жөнелтіледі. Ал жаңа зауыт оны еліміздің ішінде қайта өңдеуге мүмкіндік береді. Бұл – жоғары қосылған құны бар өнім шығару деген сөз, – деді ол.
Кәсіпорынның 2026 жылдың соңында немесе 2027 жылдың басында іске қосылуы жоспарланып отыр. Жаңа өндіріс шамамен 200 адамды жұмыспен қамтамасыз етпек.
Макулатураны қайта өңдеу зауыты – бұл тек өнеркәсіпке салынған инвестиция ғана емес, сонымен қатар өңірдің экологиялық тұрақтылығына қосылған үлес. Екінші шикізатты пайдалану қоршаған ортаға түсетін салмақты азайтады, тұйық циклді экономиканы қолдайды және көмірқышқыл газының ізін төмендетуге ықпал етеді.
