Сурет: qazdauiri.kz
Сондай-ақ бұл ақпарат таратумен ғана шектелмейді, сонымен қатар қоғамда академиялық ойлау мәдениетін қалыптастырып, фейк ақпаратпен күресуге бағытталған. Алайда, өкінішке қарай, журналистика ғылым ретінде әлі күнге дейін толық мойындалмай келеді. Бұл – қазіргі медиа кеңістіктегі үлкен олқылықтың бірі.
Осы мәселеге бейжай қарамаған жастар елімізде жаңа бастама көтеріп, ғылыми бағытта белсенді жұмысты бастады. Солардың бірі – Л.Н. Гумилев атындағы Еуразия ұлттық университетінің студенттері. Мұнда жас зерттеушілер мен болашақ журналистерге арналған ғылыми үйірме құрылды. Қазірдің өзінде жоба Журналистика және әлеуметтік ғылымдар факультетінің белсенді бірлестігіне айналып отыр. Аталған ұйым – медиа саласының өзекті мәселелерін терең зерттеп, болашақ журналистердің ғылыми әлеуетін арттырады.
«Интернеттің қарқынды дамуымен қатар медиа саласы да түрлі трансформацияға түсті. Әлі күнге дейін журналистика ғылымы лайықты бағасын алмай келеді. Оны ғылымға айналдыру да өз қолымызда. Бұл үшін медиа саласын жан-жақты зерттеуге ден қоюымыз керек. Сондықтан осы орталықты ашуды шештік. Ұйымның мақсаты – отандық ғылыми журналистиканы дамытып, медианы зерттеу әдістерін меңгерту және ұйымды тұғырлы зерттеу институтына айналдыру», дейді ғалым, үйірме жетекшісі Гүлмира Әшірбекова.
Ғылыми үйірмені ашу идеясы аталған факультет студенттерінен басталды. Олар ұстаздары Гүлмира Шайтмағанбетқызына журналистиканың дамуына үлес қосқысы келетінін айтып, өздерінің ұсыныстарын жеткізген. Бүгінде ұйымның «Telegram» арнасы мен әлеуметтік желілерде белсенді парақшалары бар. Онда 100-ге жуық студент, магистрант және докторант тіркелген.
Гүлмира Әшірбекованың айтуынша, ғылымның толық аты – «Media research». «Research» – ағылшынның зерттеу деген сөзі. Ұйым медианың өзекті мәселелерін зерттеуге қызмет ететіндіктен атын осылай қоюды жөн көрген.
Бүгінге дейін бірлестік бірнеше форсайт-сессия мен жиындар өткізді. Оған шетелден және елімізден белгілі мамандар шақырылды.
Қазіргі таңда АҚШ, Ұлыбритания, Германия, Франция, Жапония осы саланың көшбасшылары болып отыр. Бұл мемлекеттерде ғылыми журналистика – арнайы білім берілетін, зерттеу жүргізілетін, қоғам сұранысына ие сала. Елімізде бұл бағыт әлі жаңа, дегенмен осындай бастамалар арқылы ол да өз жолын табары анық.
Фариза ІЗБАСАРОВА,
Л.Н.Гумилев атындағы Еуразия ұлттық университетінің студенті
