Аталған жоба аясында Ақтөбе облысында «Цифрлық технологияларды пайдалана отырып шағын жинақты ауыл мектептерінің әлеуетін дамыту», Алматы облысында «Жаратылыстану-математикалық бағыттағы пәндер бойынша білім беру сапасын арттыру», Маңғыстау облысында «Отпан» тірек мектептерінің желісін дамыту», Ұлытау облысында «Ustaz Ulytau» сияқты өңірлік бастамалар жүзеге асты.
Дәлірек айтқанда, 2023 жылы Ақтөбе облысында 12 тірек мектеп пен 134 шағын жинақты мектеп, былтыр Ақмола, Қостанай, Павлодар, Батыс Қазақстан және Солтүстік Қазақстан облыстарында тағы 10 тірек және 30 шағын жинақты мектеп жобаға қатысты.
Жобаны іске асырудың нәтижесінде мектептердің материалдық-техникалық базасы жаңартылып, заманауи пәндік және цифрлық кабинеттермен жабдықталды. Сондай-ақ жылдамдығы жоғары интернетпен қамтамасыз ету шешімін тапты.
Жобаның ең маңыздысы – онлайн оқыту. Оқушы мен мұғалім саны аз ауыл мектептерінде математика, физика, химия, биология және ағылшын тілі пәндерінен онлайн сабақтар өткізіледі.
«Кейбір ауыл мектептерінде бір мұғалім бірнеше пәннен сабақ беріп жүр. Жаңа жобаның арқасында тірек мектептерінің ұстаздары шағын жинақты мектептегі оқушыларды онлайн оқытады. Яғни әр пәннен өз ісінің білікті маманы дәріс береді. Бұл балалардың білім сапасын жақсартып қана қоймай, ауыл мұғалімдерінің де кәсіби біліктілігін арттыруға мүмкіндік береді», деді Ы.Алтынсарин атындағы Ұлттық білім академиясының президенті Назипа Аюбаева.
Сонымен қатар мұғалімдерге цифрлық сауаттылық курстары оқытылып, технологияларды қолдану мен оқу бағдарламаларын ауыл мектептеріне бейімдеу бойынша тренингтер өткізіліп, әдістемелік қолдау көрсетіліп отыр.
Бүгінге дейін осы бағытта 10-нан астам республикалық іс-шара ұйымдастырылды. Осындай жұмыстар алдағы уақытта да жалғасады.
Азат ЕСЕН
