Нұра ауданында депутаттар Болат Әбдікәрімов атындағы көпсалалы колледжге барды. Оқу орны агроөнеркәсіп, құрылыс және өндіріс салаларына арналған он мамандық бойынша кадрлар даярлайды. Бүгінде мұнда шамамен 300 студент білім алып жатыр.
Мәжіліс төрағасы педагогтерге арнаған сөзінде Еңбек адамының рөлі мемлекет үшін маңызды екенін атап өтті. Ол қазіргі таңда елімізде жұмысшы мамандарға сұраныс 40 пайыздан асып отырғанын айтып, осыған байланысты жас, білікті кадрлар даярлауға ерекше назар аудару қажеттігіне тоқталды.
– Өздеріңізге белгілі, Президент осы жылды Жұмысшы мамандықтары жылы деп жариялады. Бұл бағытта колледждер мен училищелер елге қажетті мамандар даярлау ісінде ерекше рөл атқарады. Сіздер жас дәнекерлеушілерге, құрылысшылар мен тігіншілерге еңбекке деген шынайы құрметті, өз мамандығына деген
сүйіспеншілікті және дұрыс моральдық құндылықтарды дарытып келесіздер. Мықты экономика мен елдің жарқын болашағы – ұстаздардың қолында. Сондықтан мемлекет сіздерді толық қолдайды. Колледждерді дамытуға және мұғалімдердің еңбек жағдайын жақсартуға бар күшін салады, – деді Е.Қошанов.
Сонымен қатар ол еңбек адамын қолдауға бағытталған нақты өзгерістерге, яғни жұмысшы мамандық иелері үшін жаңадан тұрғын үй ипотекалық бағдарламасының іске қосылғанын, сондай-ақ зиянды еңбек жағдайында жұмыс істейтіндерге зейнетке ерте шығу мүмкіндігі қарастырылғанын атап өтті.
Сапар барысында депутаттар колледж студенттері өз мамандықтары бойынша тәжірибелік машық қалыптастыратын оқу шеберханаларының жұмысымен танысты. Мұнда дәнекерлеу ісі, құрылыс, автослесарь, тамақ және тігін өндірісі бағыттары бойынша білім беріледі. Колледждегі жұмыс барысы туралы жас маман Арайлым Аманкелді айтып берді. Ол «Дипломмен – ауылға» бағдарламасы аясында туған ауылына оралып, мұғалім болып қызмет атқарып жүр.
Депутаттар сондай-ақ медицина қызметкерлеріне арналған көппәтерлі тұрғын үй кешенінің күрделі жөндеу жұмыстарын тексерді. Бұл үй бұған дейін бос тұрған ғимараттан қайта жаңғыртылып жатыр. Жыл соңына дейін жаңа қызметтік баспанаға аудандық аурухананың жас қызметкерлерінен 14 отбасы қоныстанады деп жоспарланып отыр. Аймақ басшылығының айтуынша, ауылдағы медицина қызметкерлерін қолдауға бағытталған мемлекеттік қолдау шаралары арқылы бүгінде Нұра ауылында білікті кадрлар тапшылығы мәселесі іс жүзінде шешімін тапқан.
Ауданда ауыл шаруашылығы да қарқынды дамып келеді. Мәжіліс депутаттары биыл іске қосылған «МФ Рамадан» ЖШС-нің сүт фермасының жұмысымен танысты. Кәсіпорын 1 100 голштин-фриз тұқымды сауын сиыр ұстауға арналған. Технологиялық тұрғыдан жаңа сауу жабдығының көмегімен ферма тәулігіне орта есеппен 27 тонна, жылына 10 мың тоннаға дейін сүт өндіруді жоспарлап отыр.
Осакаров ауданында Мәжіліс төрағасы мен депутаттарға тағы бір инвестициялық жоба – қуаты 150 МВт болатын жел электр стансасының құрылысы таныстырылды. Бүгінде мұнда жоспарланған 21 жел қондырғысының 9-ы іске қосылып, энергия өндіріп жатыр. Алынған «жасыл» электр энергиясы қосалқы станса арқылы жалпы тарату желісіне жіберіледі. Жоба аясында ауылдан 20 жаңа жұмыс орны ашылған.
Делегация сондай-ақ 2020 жылы толық қайта жаңғыртудан өткен «Жастар» балалар мен жасөспірімдер орталығына барды. Қазіргі таңда орталықта заманауи бағыттар бойынша 25 үйірме жұмыс істейді. Ауылдың 600-ден аса баласы мұнда IT, роботтехника, жасанды интеллект, музыка мен театр өнері, қолданбалы шығармашылық, тілдер және басқа да салалар бойынша білім алып жатыр.
Осы жерде Мәжіліс депутаттары Осакаров ауданының жұртшылығы өкілдерімен кездесті. Әңгіме барысында жергілікті өндірісті дамыту перспективалары талқыланды. Атап айтқанда, алдағы жылдары өңірде сыйымдылығы 2 500 тонна болатын көкөніс сақтау қоймасы, 6 мың бас малға есептелінген еліміздегі ең ірі сүт-тауар фермасы, жылына 45 млн кірпіш шығаратын кірпіш зауытының құрылысы, сондай-ақ суармалы жерлердің аумағын айтарлықтай кеңейту ісі жоспарланып отыр.
Е.Қошанов өткен сессияда қабылданған Салық, Бюджет және Су кодекстері, сондай-ақ әлеуметтік даму бағытындағы бірқатар заң жөнінде айтты. Олардың қатарында «Келешек» жинақтау жүйесі туралы заң, дарындыларды қолдау нормалары, МӘМС жүйесінде базалық медициналық көмекті сақтау, онкоскринингті кеңейту мен басқа да маңызды бастамалар бар.
Одан бөлек, Е.Қошанов аудандық мәслихат депутаттарын заң шығару жұмысына белсендірек қатысуға шақырды. Өз ұсыныстарын Қоғамдық палата арқылы енгізіп, сондай-ақ Мәжіліс сайтындағы арнаулы модульдің мүмкіндіктерін пайдалануға кеңес берді. Бұл жайт қабылданатын заңдардың сапасын арттырып, олардың нақты өңірлік жағдайларға сай болуына ықпал етеді.
Азаматтардың, кәсіпкерлердің және аудан басшылығының өтініштері мен ұсыныстары Мәжіліс депутаттары тарапынан жаңа парламенттік сессия басталған кезде талқылауға шығарылады.
