Тазалық жұмыстары үздіксіз жалғасып жатыр. Оған 150-дей техника мен екі мыңнан астам еңбеккер жұмылдырылған. Сенбіліктерге қала тұрғындары ерекше ықылас танытады. Акцияға үлес қосқандар арасында еңбек ардагерлері, зиялы қауым өкілдері, қоғам белсенділері, түрлі мекеме қызметкерлері мен ерікті жастар бар.
Экологиялық бастама аясында өткен жылы қалада 200 мыңға жуық ағаш көшеті отырғызылды. Мегаполисте тазалыққа қатысты тұрғындардың ұсыныс-шағымдарын қабылдайтын желіде «TazaQazBot» арнайы платформа іске қосылды. Бүгінге дейін оған тұрғындардан 205 өтініш келіп түскен. Оның 159-ы қаралып, тиісті шешімдер қабылданды.
Жергілікті әкімдік қаланы көріктендіру мақсатында бірталай жұмыс атқарып жатыр. Шаһардың магистралды жол қиылыстарына, айналма жолдар мен жол жиектеріне көпжылдық раушан гүлдері егілді. Мамандар гүлдердің түрі мен түстік үйлесіміне де ерекше мән берді. Қаланы көркейту жұмыстары өткен жылмен салыстырғанда биыл 13%-ға артық орындалды.
Бүгінде жол жиектеріне көгал егіліп, тамшылатып суару жүйесі орнатылып жатыр. Сол арқылы көшедегі шаң-тозаңды азайтып, жалпы шаһардың экологиясын жақсарту көзделіп отыр. Одан бөлек, жаз күндері аптап ыстықта салқын ауа климатын қалыптастыру мақсатында қалада бірқатар жұмыс қолға алынды. Атап айтқанда, шаһардың әр аумағында орналасқан қалалық жайлы ортаны дамыту басқармасына қарасты 40 субұрқақ жөнделіп, жаңартылып жатыр. Бұл жұмыстарға қазынадан 250 млн теңге бөлінді. Сонымен бірге «БМК» каналынан «Жаңа шек» каналына секундына 200-250 литр су босатылды. Осы каналдан тараған ағын су Аймауытов, Ақпан батыр, Иляев, Адырбеков, Тәуке хан даңғылы, Толстой, Тәшенов, Қазыбек би, Дулати, Шаймерденов, Желтоқсан, Темірлан тас жолы көшелерінің жиегіндегі арық-атыздарға барып құйылады. Алдағы уақытта «Шымкент» каналы арқылы Қазыбек би, Дулати көшелеріндегі, Абай саябағы бойындағы арықтарға су жіберу көзделіп отыр.
Қалада жайлы ортаны қалыптастыруға өзен-көлдердің жағасын бекіту жұмыстары да кіреді. Айталық, осы бағытта Бадам өзенінің арнасы нығайтылды. Соның нәтижесінде, Жыланбұзған, Тоғыс, Маятас тұрғын алаптары, Абай, Тұран аудандарындағы елді мекендерге төнетін қауіп сейілді. Биыл да өзеннің біраз аумағында жағалауды бекіту жұмыстары жүргізіледі. Осы мақсатқа орай жобалық-сметалық құжаттамалар әзірленіп, мемлекеттік сараптама жасалды. Құрылыс жұмыстары алдағы уақытта басталады. Сондай-ақ демеушілер есебінен Маятас тұрғын алабында жаяу жүргіншілерге арналған көпір мен ойын алаңшасы салынды. Ал Қызылжар елді мекенінде аспалы көпір құрылысы жүргізіліп, пайдалануға берілді. Бұдан өзге, биыл «Абай», «Металлург», «Алатау», «Жеңіс», «Отбасы аллеясы» саябақтарында балалар ойын алаңдарының құрылысын жүргізу жоспарланып отыр. Мұнымен қоса, қалада жаңа аллеялар бой көтеріп жатыр. Кейінгі екі жылда бірнеше гүлзар салынып, тұрғындар игілігіне берілді.
Әкімдік қолға алған жұмыстың бірі – орман қорын молайту. Кейінгі үш жылда 276 га жерге 230 мың түп көшет отырғызылды. Мамандардың айтуынша, жасыл желек қаланың экологиялық ахуалын жақсартады. Өйткені жылдан-жылға шаһарда көлік пен өндіріс ошақтарының саны артып келеді.
