Инвестор: Аман Әлімбаев
Вирджиния сияқты штаттарда дата-орталықтар энергияның төрттен бірін жұтып отыр. Бұл күн, газ және атом энергетикасына сұраныс артады, демек инвестор үшін бұл үлкен мүмкіндік деген сөз. Медицинада да жағдай түбегейлі өзгеріп жатыр. Бұрын дәрі жасау үшін 10-15 жыл кетсе, қазір жасанды интеллектінің арқасында мерзім екі есе қысқарады. Бұл дегеніміз – паркинсон, қатерлі ісік, инфекцияға төзімді ауруларға қарсы дәрілер әлдеқайда ерте шығуы мүмкін. Демек фармацевтика мен биотехнология компаниялары үлкен серпіліс жасайды. Ақша салған адам ұтылмайды.
Қаржы саласына келсек, «Goldman Sachs» IPO үшін қажетті құжаттардың 95%-ын жасанды интеллектімен жазады. Бұрын апталап дайындалатын есептер қазір бірнеше минутта жасалады. Банк пен сақтандыру компаниялары да осы құралды енгізіп, қызмет сапасын жақсартып отыр. Бірақ тәуекел де бар. Кибершабуылдар жасанды интеллектінің арқасында жылдамырақ әрі күрделірек бола түсті. Залал жылына жүздеген миллиард доллармен есептеледі. Бұл бизнес үшін клиент жоғалту, жұмыстың тоқтап қалуы, беделге нұқсан келтіру сияқты шығындарға алып келеді. Сондықтан киберқауіпсіздік те – инвесторлар назар аударатын сала.
Осыдан шығатын қорытынды бар. Инвестор қайда қарау керек? Ең алдымен чиптер мен жартылай өткізгіштер, «Nvidia», «TSMC», «ASML», «Broadcom» сияқты компаниялар жаңа «алтын безгегінің» тасасында тұр. Екінші бағыт – бұлттық технологиялар мен дата-орталықтар: «Amazon AWS», «Microsoft Azure», «Google Cloud». Үшінші бағыт – энергетика мен инфрақұрылым, себебі дата-орталықтарды энергиямен қамтамасыз ететіндерге орасан сұраныс бар. Төртіншіден, денсаулық сақтау мен фармацевтика, жасанды интеллектіні қолданатын компаниялар үлкен серпіліс жасайды. Бесіншіден, киберқауіпсіздік. Нарық көлемі – қазірдің өзінде 200 млрд доллар. Сондықтан жасанды интеллекті тек технология емес, ол – жаңа экономиканың жүрегі. Оған дер кезінде назар аударған инвестор ұтылмайды.
Дайындаған –
Елігімай ТӨҢКЕР,
«Egemen Qazaqstan»
