Суретті түсірген – автор
Шырға сайысының шарты біреу: 800 метрлік жарыс жолында түлкінің тулағына қайсысы бұрын жетті, жеңіс соныкі. Ұйымдастырушылар ең әуелі тазыларды топ-топқа бөлді. Олардың ішінде жарыс жолына жаңа шыққаны да, жүлдеден жүлде алғаны да бар еді. Дей тұрғанмен, кей-кейде бақтың шабатыны да бар... Тартысты жарыс басталмас бұрын Әнұран ойнап, ақ тілектер ақтарылды.
«Өскеменде тұңғыш рет қала әкімінің қолдауымен тазылардың шырғаға түсу сайысы ұйымдастырылды. Көздегеніміз – ата дәстүрді жаңғырту. Сонымен қатар бекзат өнерді жалғастырса екен деген ниетте жастарды қызықтырғымыз да келді. Сөйтіп, жарыс ұйымдастыруды жөн деп шештік», деді Өскемен қалалық спорт бөлімінің басшысы Диас Ерланұлы.
Жарыс алаңында ақшаңқаң киіз үй тігіліп, қоңыр домбырадан күй әуеледі. Рухты әндер шырқалды. Сайысқа қатысушылар жарап тұрған тазылары туралы аңызға бергісіз әңгімелерін айтып, арқа-жарқа болысты. Бірінің тазысы қабан алса, енді бірі алдына қара салмайды десті.
«Лашын» атты тазыммен екінші рет жарысқа қатыстық. Аңға түсіп көрмегенімен, күнделікті жүгіреді. Тамағын да уақытымен беріп, жаратып отырамын», дейді итбегі Назым Тұрсынбаева.
Сөйтіп, жарыс жолына 40 тазы топ-тобымен, кезек-кезегімен шықты. Ә дегенде құмайдың бірі шырғаға орнынан атылса, енді бірі жайбасарлық танытты. Жарты жолдан кері қайтқан тазылар да болды.
Нәтижесінде, жүлделі 1-орынды Еркебұлан Әділбековтің «Сары қыз» атты тазысы еншіледі. 2-орын Әлихан Бәйтековтің «Жебе» дейтін тазысына бұйырды. Ал 3-орын Ботажан Жұмахановтың жаратқан жүйрігі алды. Өскеменде алғаш ұйымдастырылған жарыстың тартысты өткенін байқаған ұйымдастырушылар дәстүрлі сайысқа айналдырамыз дегендей де ұсыныс айтты.
Шығыс Қазақстан облысы
