Xinhua агенттігі кездесуді тарихи контексте қарастырды. Журналистер Тоқаевтың сапары Екінші дүниежүзілік соғыстағы Жеңістің 80 жылдығына арналған іс-шаралармен тұспа-тұс келгенін атап өтті. Қытай үшін бұл символдық мәнге ие: мұндай шараларға Қазақстанның қатысуы екі елдің жақындығын және қарым-қатынастың сенімді сипатын айғақтайды. Негізгі назар Си Цзиньпиннің: «Әлемде қандай өзгерістер болмасын, Қытай мен Қазақстан тату көршілік саясатын ұстанып, әділетті халықаралық тәртіп орнатуға күш салуы керек» деген сөзіне аударылды.
CGTN телеарнасы мүлде басқа қырын алға тартты. Онда келіссөздердің нақты нәтижелері басты назарға шықты. Көрермендерге тараптардың 20-дан астам келісімге қол қойғаны еске салынды: энергетика мен технологиядан бастап, білім беру, спорт және жабайы табиғатты қорғауға дейін. CGTN Тоқаевтың: «Қазақстан мен Қытай қарым-қатынастары тарихтағы ең жоғары деңгейге жетті» деген сөзіне сілтеме жасады, сондай-ақ өткен жылғы рекордтық сауда көрсеткіштерін келтірді.
«Астана мен Пекин бір-бірін батыл қолдап, ынтымақтастықты жаңа деңгейге шығару керек», — деп атап өтті Си Цзиньпин.
Gov.cn мемлекеттік порталы болса, жағдайды әлдеқайда ұстамды баяндады. Онда қол қойылған құжаттар жайлы егжей-тегжей айтылмай, дипломатиялық тұжырымдарға ғана тоқталды.
«Халықаралық жағдайдағы өзгерістерге қарамастан, Қытай мен Қазақстан әрқашан тату көрші әрі серіктес болып қала береді», — деп келтіреді ресурс Қытай басшысының сөзін.
Ал ҚХР Сыртқы істер министрлігі өз мәлімдемесінде серіктестіктің стратегиялық сипатына ерекше екпін жасады. Министрліктің пайымынша, Қытай мен Қазақстан — «бір-біріне сеніп, арқа сүйей алатын көршілер». Сондай-ақ энергетикалық ынтымақтастық, көлік дәліздерін дамыту және мәдени алмасулардың маңыздылығы бөлек атап өтілді. Әсіресе екі ел арасындағы Мәдени алмасу жылының қарсаңында мұның мәні зор екені көрсетілді.
Жалпы, қытайлық жетекші БАҚ-тардың барлығы ортақ ойға тоғысты: Си Цзиньпин мен Қасым-Жомарт Тоқаевтың кездесуі стратегиялық әріптестікті нығайтудың маңызды қадамы болды. Алайда әр басылым өз қырынан көрсетті: Xinhua — символдық сабақтастық тұрғысынан, CGTN — нақты жетістіктер тұрғысынан, ал gov.cn мен Қытай СІМ — ұстамды дипломатиялық тіл арқылы.
