Суретті түсірген – автор
Қазақ халқының ұлттық мұрасын заманауи үлгіде жаңғыртып, көне дәстүрлерді бүгінгі қоғам өміріне бейімдеп, жастардың ұлттық құндылықтарға деген қызығушылығын арттыруды мақсат еткен іс-шараға жергілікті қолөнер шеберлері де қатысты. Музейге кірген бойда өскемендік өнерпаздар әуелете ән салып, алыстан келген меймандарды қарсы алды. Ә дегенде оңтүстік өңірден келген қонақтар сапардың мақсатын түсіндіріп, Өнер музейіне деп алып келген сыйлықтарын табыстады.
– Жаһандану дәуірінде ұлттық болмысты сақтау – ел болашағы үшін аса маңызды міндет. Қазіргі таңда жас ұрпақтың санасында дәстүр мен салтқа деген көзқарастың әлсіреп, кейбір ұлттық құндылықтардың ұмыт бола бастауы байқалады. Осындай жағдайда халықтың тарихи жады мен рухани тұтастығын ұмытпауымыз керек. Сол үшін де осынау игілікті сапарымызды бастадық, – деді Шымкент қаласынан келген «Әдет-ғұрып және салт-дәстүр орталығы» директоры Жұмабай Ғаппарұлы.
Мәдени іс-шарада құрсақ шашу, ат қою, шілде күзету, тұсау кесу, жақсының орнына аунату секілді ғұрыптар көрсетілді. Қоғамдағы дәстүр, әдет-ғұрып тал бесіктен жер бесікке дейін жалғасса, бұл күнгі қойылымда шаңыраққа келін түсіруден бастап, кішкентайдың тәй-тәй басқанға дейінгі шақ қана көрсетілді. Соның өзінде қаншама мағына, үлкен тәрбие жатыр?
Кеш соңында екі тарап бір-біріне ризашылығын білдірді. Шығыстың мәдениетіне, руханиятына бейжай қарамайтын азаматтар бізге де «Әдет-ғұрып орталығы» керек екен десіп тарқасты.
Шығыс Қазақстан облысы,
Өскемен қаласы
