«Жастар ресурстық орталығы» ұйымдастырған «Ауылдағы бір күнім» тақырыбымен өткен сайыста ауданға қарасты 13 ауылдық округтен келген қатысушылар бірнеше командаға бөлініп, өзара бақ сынасты. Ереже бойынша ер жігіттер садақ ату, асық ату, қазақ күресі, мас-рестлинг (таяқ тартыс), алыптар сайысы және арқан тарту сынды ұлттық ойын түрлерінен күш сынасты. Ал қыз-келіншектер қауымы арасында табаға нан жабу, қамыр жаю, кеспе кесу, талқаннан жент жасау, ұлттық тағам түрлерін әзірлеу бойынша сайыстар өтті.
Қатысушылар ауыл өмірінің сәні мен салтын көрсетіп, өз өнері мен шеберліктерін көрсетті. Көрермендер қазақтың ұлттық ойындары мен тағам дәстүрлеріне қанығып, ауыл тіршілігінің әсем көрінісін тамашалады. Қазылар алқасының шешімімен Тұрбат ауылы округі командасы жеңімпаз танылса, екінші орынды Қарабау ауылы округі, үшінші орынды Қазығұрт ауылы округі иеленді. Аудан әкімі Азизхан Исмаилов үздік деп танылған командаларға арнайы диплом, алғысхат және бағалы сыйлықтар табыс етті.
Түркістан облысы
