Бұл оқиға Қазақстан мен Ресей арасындағы білім беру саласындағы ынтымақтастықты нығайту жолындағы маңызды қадам болды.
ММХҚИ ректоры Анатолий Торкуновтың айтуынша, филиалдың ашылуы – Қазақстанның заманауи, бәсекеге қабілетті жоғары білім беру жүйесін қалыптастыру және халықаралық байланыстарды кеңейту бағытында сенімді ілгерілеуінің айғағы.
Ол Қазақстанның жаһандық білім беру стандарттарына ашық әрі бағытталған ел екенін атап өтті. Бүгінде елімізде ресейлік жоғары оқу орындарының 9 филиалы табысты жұмыс істеп тұр, онда шамамен 4 мың студент оқиды, оның ішінде 1 мыңнан астамы мемлекеттік грант иегерлері.
Сонымен қатар, Қазақстан өз университетінің кампусын Ресейде ашқан алғашқы мемлекет атанды – әл-Фараби атындағы Қазақ ұлттық университетінің Омбы қаласындағы филиалының ашылуына Қазақстан Президенті Қасым-Жомарт Тоқаевтың өзі қатысты. Бұдан бөлек, 60 мың қазақстандық студент Ресейдің жоғары оқу орындарында білім алып жүр. Бұл елдер арасындағы білім беру саласындағы сенім деңгейінің жоғары екенін көрсетеді.
Анатолий Торкунов филиалдың ашылуы екі мемлекеттің адами капиталды дамыту мен әлемдік білім беру кеңістігіне интеграциялануға ұмтылысын көрсететін стратегиялық қадам екенін айтты.
Оқу бағдарламалары дипломатия, экономика және жоғары технологиялар, соның ішінде жасанды интеллект салаларының тоғысында жұмыс істей алатын жаңа форматтағы мамандарды даярлауға бағытталған.
ММХҚИ-дың Астанадағы филиалы халықаралық деңгейдегі жаңа буын көшбасшыларын, дипломаттар мен сарапшыларды даярлауға маңызды үлес қосады, – деп түйіндеді ректор.
