Жазушылар одағы ұйытқы болған бұл іс-шараға елдің рухани ортасында жүрген зиялы қауым өкілдері мен шәкірттері, туған туыстары мен студенттер қатысты.
Іс-шараға жиналған қаламгерлер ерекше мінезді ақын-майдангер туралы естеліктерін айтып, емен-жарқын әңгіменің тиегін ағытты. Кітапхана қоры ұйымдастырған көрмені тамашалады.
Кеш тізгінін Жазушылар одағы басқармасының хатшысы, профессор Қансейіт Әбдезұлы алып, бас баяндаманы ақын Болат Шарахымбай жасады.
Ол бүгінгі мерейтой иесінің өмір жолы мен шығармашылығы жайында кеңінен толғай келіп, Тоқаш Бердияров тұлғасына ерекше тоқталды.
«Тоқаш Бердияров – әдебиетке өткен ғасырдың бел ортасында келген. Соғыс көрген аға буынның қатарына жатады. Ол әдебиетке жай келмей, поэзияға өзіндік өрнегін сала келген сыршыл, сыншыл, шыншыл ақындардың бірі болып қосылды. Ашығын айтсақ, Тоқаш Бердияров өткен ғасырдың 50-80 жылдар аралығындағы атағы мен шатағы қатар шыққан ең даңқты ақын. Көптеген ізбасар ақын Тоқаштың жанында жүргенді, үстел басында онымен бірге отырғанды үлкен дәреже санайтын. Осы кезеңде аты шыққан Мұқағали Мақатаев, Қадыр Мырза Әлі, Төлеген Айбергенов, Өтежан Нұрғалиев, Есенғали Раушанов, Аманхан Әлім, Қасымхан Бегманов, тағы басқа сияқты тегеурінді ақындардың бәрі Тоқашты ұстаз тұтқан, оның шығармашылығынан көп үйренген. Тоқаш – бір өңірдің, не бір аймақтың ғана ақыны емес, ол қара орман бүкіл қазақ халқының ақыны. Сондықтан ел басында жүрген әкім-қаралар осы жөнінде мықтап ойланғандары жөн демекпін, деді баяндамашы өз сөзінде. Сондай-ақ, баяндамашы кітаптың ерекшеліктеріне қатысты ой өрбітіп, жинаққа заңғар жазушы Мұхтар Әуезовтен бастап 50-ден астам автордың естеліктері мен зерттеулері топтастырылғанын атап өтті.
Кеш барысында белгілі қаламгерлер Марат Тоқашбаев, Жұмаш Кенебай, Мырзан Кенжебай, Елдос Тоқтарбай, Әлібек Байбол, Қанат Алтынбек, қазақтың мұзбалақ ақыны Мұқағалидың ұлы Жұлдыз Мақатаев, белгілі фарабитанушы ғалым Жақыпбек Алтаев, дәрігер-профессор Сәуірбек Рузиддинов, Орталық мемлекеттік архив директоры, тарихшы-ғалым Сәбит Шілдебай сөз сөйлеп, кітап жайында лебізін білдірді.
Іс-шараға Тоқаңның туған жерінен арнайы ат басын бұрып келген қонақтар «Тағдырлы дарын» кітабының құрастырушысы әрі Тоқаш ақынның іздеушісі ақын Болат Шарахымбайға аудан әкімі атынан алғыс айтып, құрметтерін көрсетті.
Кітапханада өткен бұл басқосу азулы ақын Тоқаш Бердияров шәкірттерінің басы қосылып, ұстаздарын дәріптеп, ақынның артында қалған мұрасын ел руханиятындағы орны мен миссиясын тағы бір мәрте айғақтайтын ерекше кеш ретінде есте қалды.
