«Қазгидромет» РМК мамандарының мәліметінше, алдағы күндері Қазақстан аумағы арқылы Жерорта теңізі жақтан келген жаңа циклон өтеді. Осыған байланысты республика бойынша қар, боран, жаңбыр мен қар аралас жауын-шашын, сондай-ақ көктайғақ пен тұман күтіледі.
Синоптиктердің болжамынша, солтүстік-батыста 3 қаңтар күні қатты қар жауады, ал 5 қаңтарда оңтүстік-шығыста жауын-шашын күшейеді. Кей өңірлерде жел екпіні артып, ауа райы қолайсыз болады.
Болжамға сәйкес, елдің көп бөлігінде қар мен боран, батыс, оңтүстік және оңтүстік-шығыста жаңбыр мен қар аралас жауын-шашын жауады.
Сондай-ақ республика бойынша көктайғақ, тұман және желдің күшеюі болжанып отыр.
Синоптиктер ауа температурасының бірқатар өңірде өзгеретінін атап өтті.
Температура батыста көтерілуі мүмкін: батыс өңірлерде түнде 0…–8°C, күндіз –2…+5°C.
Температураның төмендеуі болжанады:
– Орталықта түнде –10…–18°C, күндіз –5…–12°C;
– Оңтүстікте түнде 0…–10°C, күндіз –6…+2°C;
– Оңтүстік-шығыста түнде 0…–5°C, таулы аймақтарда –8…–13°C, күндіз –2…+3°C, тауда –5…–10°C.
Ал шығыс өңірлерде түнгі уақытта ауа температурасы –5…–13°C-қа дейін көтеріліп, күндіз –10°C-қа дейін төмендейді.
«Қазгидромет» өкілдері тұрғындарды ауа райының күрт өзгеруіне байланысты жолға шыққанда сақ болуға, әсіресе көктайғақ пен боран кезінде қауіпсіздік шараларын қатаң сақтауға шақырады.
