Сурет: zhaikpress.kz
Жекелеген тауарлар бойынша баға төмендегені байқалды. Мәселен, алма (-2,1%), қияр мен пияз (-1,3%), шай (-0,9%), балық пен тауық еті (-0,6%) арзандаған. Осыған қоса басқа да бірқатар азық-түлік өнімдерінде төмендеу тіркелген. Ал маусымдық сипатқа ие көкөністер бойынша баға құбылмалы болып отыр.
Сауда және интеграция бірінші вице-министрі Айжан Бижанова ауыл шаруашылығы өнімдерінің ерте пісетін түрлерін жеткізуге қатысты қабылданып жатқан шаралар жөнінде баяндады. Оның айтуынша, нарықта ұсынысты көбейту үшін биыл сәуір-маусым айлары аралығында үшінші елдерден көкөністерді бажсыз әкелу туралы ұсыныс ЕАЭО Кеңесінің қарауына шығарылмақшы. Бұл – баға тұрақтылығын қамтамасыз ету бағытындағы қосымша қадамдардың бірі.
Кеңес барысында вице-премьер Астана мен Алматы қаласы әкімдерінің орынбасарларын тыңдап, өңірлердегі ағымдағы жағдайға жеке-жеке тоқталды. Елордада азық-түлік инфляциясының баяулау үрдісі сақталып, 2025 жылдың қорытындысы бойынша әлеуметтік маңызы бар тауарлардың орташа баға индексі 107,4% деңгейінде қалыптасқан. Бұл ел бойынша ең тұрақты көрсеткіштердің бірі саналады. Бағаны ұстап тұруға уақтылы келісімшарттар жасау мен ірі сауда желілерімен сауда үстемесін шектеу жөніндегі келісімдер сеп болған. Елордада бүгінде 180-нен астам сауда нүктесі әлеуметтік тауарларды сатады. Сонымен қатар делдалдық схемаларды анықтау, жәрмеңкелер санын арттыру бағытындағы шаралар жалғасып жатыр. 2026 жылы Астанада 300-ден астам демалыс күнгі жәрмеңке өткізу жоспарланған, ал жалпы ел бойынша 10 мыңға жуық жәрмеңке ұйымдастырылады.
Алматы қаласында 2025 жылдың қорытындысы бойынша әлеуметтік маңызы бар азық-түлік тауарларының баға индексі 8,9%-ды құраған, ал жыл басынан бері өсім небәрі 0,2% деңгейінде. Қалада ет пен сүт өнімдерінің негізгі түрлері бойынша баға тұрақты, ал тауық еті мен жекелеген сүт өнімдері арзандаған. Бағаның өсуі көбіне көкөністер мен бакалея тауарларына тиесілі. Дегенмен Алматыда қырыққабат пен қарақұмық жармасының бағасы республикалық орташа көрсеткіштен төмен. Қала билігі бағаны тұрақтандыруға тікелей жеткізу тізбегін кеңейтуге, демалыс күнгі жәрмеңкелер санын ұлғайтуға және сауда желілері мен базарларда баға мониторингін күшейтуге ден қойып отыр.
Жиынды қорытындылай келе, Серік Жұманғарин өңірлердегі жұмысты жандандыруды тапсырды. Ол аумақтық сауда мен тұтынушылардың құқықтарын қорғау департаменттеріне әлеуметтік маңызы бар тауарларға белгіленген шекті сауда үстемесінің сақталуын қатаң бақылауды әрі мониторингті күшейтуді міндеттеді.
