Коллажды жасаған – Қонысбай ШЕЖІМБАЙ, «EQ»
Ұлттық статистика бюросының 9 ақпанда жариялаған мәліметіне сәйкес, есепті кезеңде елге 23,8 мың адам келген, ал 7,6 мың адам Қазақстаннан кеткен.
2024 жылмен салыстырғанда көші-қон белсенділігі төмендеген. Мәселен, келгендердің саны 20,7%-ға, елден кеткендердің саны 40,5%-ға азайған.
Көші-қон алмасымының негізгі бөлігі бұрынғыдай ТМД елдеріне тиесілі. 2025 жылы Қазақстанға келгендердің 81,8%-ы және елден кеткендердің 71,8%-ы ТМД мемлекеттеріне тиесілі болды. Келгендер арасында этникалық қазақтар мен орыстар басым болса, елден кеткендердің негізгі бөлігін орыстар мен қазақтар құрады.
Ал ішкі көші-қон, керісінше, өсім көрсетті. Өңіраралық қоныс аудару көлемі өткен жылмен салыстырғанда 13,6%-ға артты. Ішкі көші-қонның оң сальдосы төрт өңірде – Астана, Алматы, Шымкент қалаларында және Алматы облысында тіркелді. Ең жоғары халық өсімі елордада байқалып, көші-қон есебінен халық саны 87 мың адамға артты.
Өңіраралық көші-қонның теріс сальдосы Солтүстік Қазақстан, Шығыс Қазақстан және Қарағанды облыстарын қоса алғанда, елдің көптеген аймақтарында сақталды.
Айта кетейік, бұған дейін Қазақстан халқының саны 20,4 миллионнан асқанын жазған едік.
