Ортақ жеңіс – ортақ жеміс

Бүгінде қандай ел болмасын жаһандық экономикамен байланыссыз еместігі белгілі. Сондықтан одан әрі дамуға ұмты­лушылардың Дүниежүзілік сау­да ұйымымен тығыз қарым-қатынасты қалыптастыруды қалауы заман талабы болып табылады. Осы қатарға қосылуды алға қойған елімізге жол ашылуы баршамызды қуантқан оқиға болды. Бұған дейін де әлемдік нарықтағы бәсекелестікте біраз ысылған отандық өндірістеріміздің енді өз өнімдерін кең ауқымда өткізуге мүмкіндігі бар. Алайда, осы жағдайды пайдалана алу да оңай болмастығы анық. Өйт­кені, шындығын айтқанда, тал­ғампаз тұтынушылар таң­дауына сай келетін тауарлары­мыз бен қызметтеріміз әзірге аз екенін жасырғымыз келмей­ді. Осыған байланысты Елба­сы­ның Үндеуінде одан туатын қиындықтың айтылуы бізді нағыз тайталасты бәсеке күтіп тұрғандығына меңзейді. Оған төтеп беру, күресуді күшей­ту, өз мүдделерін қорғай білу барлық кәсіпкерлерге сын дер едім. Көбі жаңа экономиканың қыр-сырына қанық әріптес­те­рімнің күткені де осындай ауқымға шығу болғандықтан қолдан келгендерін таныта аларына сенемін. Еліміз өндірісінің шаңырағы саналатын Қарағанды аймағын­да шетелдерге де өтімді тауар­лар баршылық. Бірақ басым бөлігі мыс, металл тәрізділі дайын өнімдерден әрі аспайды. Жұрт жаппай тұтынатын заттар мен бұйымдар шығару әлі кең көлемде өріс алмай келеді. Бұрын балалар велосипедіне дейін жасайтын кәсіпорындар осындай жолға көше алмай жатыр. Қандай да тауарды өндіруге қолайлы жағдай бар жергілікті өндіріске туып отырған мүмкіндік қамшы салар деп ойлаймыз. Ал ауыл шаруашылығындағы резервтер қаншама десеңізші. Шетелдік тұтынушылар қызығатын таза табиғи азық-түліктерді көптеп шығару, оларды қазақстандық брендке айналдыру қолдан келмес іс емес. Оны жаһандық нарық шарттарына сай етіп өндіруді жолға қойған кәсіпорындардың үлгісі бойынша ең алдымен осы шаруаны ширату қажет. Бұған ұмтылушыларға қолдау көрсету бұрын да кем болмаса бұл жолы одан сайын ұлғаяры сөзсіз. Дүниежүзілік сауда ұйымына мүше елдердің біразы осындай қиындықтардан өткенін біле­міз. Біз де жеңе білуіміз керек. Экономикалық сындарда шың­далған еліміздің оны еңсеруіне бәріміздің күш салуымыз қажет. Ортақ жеңіс – ортақ жеміс. Бекзат Алтынбеков, Жезқазған қалалық мәслиха­тының депутаты, кәсіпкер. ЖЕЗҚАЗҒАН.