Экспозицияда бірнеше жанрды еркін меңгерген өнер иесінің көпжылдық шығармашылық жолынан сыр шертіп, көркем қолтаңбасын көрсететін 60-тан аса туынды ұсынылды. Шектеуге бағынбайтын шебер суретші өз шығармаларында дәстүр мен жаңашылдықты үйлестіре отырып, кеңістік пен форманы тәжірибе арқылы зерттейді. Түс пен композиция көрерменнің эмоционалды қабылдауын оятуға талпынады.
Қами Айтқалиевтің шығармашылығы тынымсыз ізденіске толы. Автор құрақ құрау, ши тоқу, жүн өңдеу секілді дәстүрлі қазақ қолөнері әдістерін заманауи тұрғыда қолданады. Бұл тәсілдер ұлттық мәдениеттің терең тамырынан қуат алып, жаңа форма мен мазмұнға жол ашады. Осы арқылы оның туындылары қазақ сәндік-қолданбалы өнерін жаңаша серпінмен жандандырып, өткен мен бүгінді байланыстырады. Бұл оның «Аңыз ана» (2024), «Жаңбырдан кейін» (2024), «Күту» (2024), «Аңшылар» (2023) атты шығармаларында айқын көрініс тапқан. Әр жұмысында автор табиғатпен, дәстүрмен және адамның ішкі әлемімен үндескен ойлар мен сезімдерді шебер жеткізіп, көрерменді жаңа көзқарасқа жетелейді. Көңіл баураған кескіндер тек қолөнердің ғана емес, сонымен қатар философиялық ой мен мәдениеттің кең өрісін ашады.
«Суретші кескіндеме жанрында да өзіндік шығармашылық тілін қалыптастырған. Оның жұмыстарында монохромды бояу шешімдері, сәндік және монументалдық сипат айқын байқалады. Бұл ерекшелік Айтқалиевтің ішкі көркемдік қажеттілігінен туындап, кеңістікпен үйлесімді композициялық құрылым құруға бағытталған», дейді көрме жетекшісі Ақбота Алимхожина.
Суретшінің графикалық мәнерде орындаған бірегей туындылары да көрме төрінен орын алған. Бұл шығармалар автордың пластикалық ойлау жүйесін, сызық пен ырғаққа негізделген ізденістерін айқындай түскен.
Шығармашылығы ұлттық болмысты, тарихи жады мен заманауи көркемдік ізденістерді үйлестірген суретші биыл 80 жасқа толып отыр. Қазақ бейнелеу өнерінің дамуына елеулі үлес қосып жүрген шеберге зор табыс тілейміз.
АЛМАТЫ
