Даму жолында жасалған батыл тәуекелдер

Мемлекет басшысы Нұр­сұлтан Назарбаев еліміздің дамуы үшін және әлемде алға озған өзге де алдыңғы қатарлы елдермен тең терезелі болу мақсатында көптеген соны шешім, батыл қадамдар жасаумен келеді. Жуырда ғана жария еткен Мемлекеттік дамудың бес институттық реформасы қоғамдық ортада, соның ішінде қаржы-экономика саласының мамандары мен саясаткерлер және қоғам қайраткерлері арасында қызу талқы мен жан-жақты қолдауға ие болғаны мәлім. Міне, бүгін Елбасы Нұрсұлтан Назарбаев өзі ұсынған сол жаңа да жасампаз бағытты жан-жақты тарата отырып, баршамызға нақты тапсырмалар мен міндеттер жүктеп отыр. Қаржыгер ретінде мені аса қызықтырғаны – Мемлекет басшысының нұсқаған «Нақты 100 қадамында» отандық қаржы институттарының бүкіләлемдік деңгейдегі мәртебесін арттыру мен жаһандық жүйеде өзіндік бастамасын қалыптастыруға негізделген міндеттерінің заман талабымен қатар үндескендігі болып отыр. «Астана-ЭКСПО-2017» инфрақұрылымы аясын­да арнаулы мәртебеге ие Астана Ха­лықаралық қаржы орталығын құру және оны алыс-жақын мемлекеттердің Орталық қаржы хабына айналдыру, Исламдық қаржыландыру институттарын жандандырып, жетекші қаржы орталықтарымен жүйелі әрі жайлы әуе қатынасы жүйесін құру секілді заманауи даму талабына сай тапсырмалардың күні ертең берері мол болатынына сеніміміз зор. Әлемдегі қар­жы және бизнес саласын тың­­ғылықты зерттеп жүрген ма­ман ретінде бұл тәуе­келдердің келешекте үл­кен жетіс­­тіктерге жеткізетінін батыл болжай ала­мын. Дүние жүзіндегі қарыштап дамып кеткен елдер бір ғана инвестицияның күшімен немесе қазба-кен байлықтарымен бүгінгі жағдайға жеткен жоқ. Дамудың негізгі өзегінде сол мемлекеттің ұстанған ішкі-сыртқы саяси бағыты мен өзге дамыған және дамушы елдермен өзара байланысы, қарым-қатынасы жатыр. Қазақ елінің және Елбасының қадам басқан болашағы бүгінде барша әлемге белгілі, сондай-ақ, халықаралық қоғамдастық тарапынан зор сенім мен қолдауға ие болып отыр. Бұл мүмкіндікті тиімді пайдалану тетігі бізде сәтімен жасалып отырғандығын орынды ескеруіміз керек. Серік АХАНОВ, Қазақстан Қаржыгерлер ассоциациясының төрағасы. АЛМАТЫ.