Мәдина мен Жамал

киім үлгілерімен таңғалдырмақ Облыс орталығындағы Сұлтанмахмұт Торайғыров атындағы мемлекеттік университеттің Дизайн, театр және сурет өнері факультетінің студенттері Жамал Қалиева мен Мәдина Қасқырбаева Т.Жүргенов атындағы Қазақ ұлттық өнер академиясында өткен еліміздің жоғары оқу орындары студенттері арасындағы «Дизайнерлер» байқауының дипломанттары атанды. Бұл байқауға студент қыз­дар заманауи киім үлгілерін апарып дизайн саласы бойынша өздерінің шығармашылық идеяларын ұсынды. Яғни, байқау шарты бойынша Жамал мен Мәдина киім эскиздерін сызып, оны пішіп, тігіп шықты. Ал, қазылар алқасы барлық қатысушылардың жасаған киімдерінің жаңашылдығы мен дизайнерлік ойлау қабілетінің ерекшелігіне, жұмысты орын­даудағы сапа мен ұқып­ты­лыққа, композициялық жә­не түстердің үйлесімділігін ұтымды қолдана білгендерін атап өтті. Сұлтанмахмұт Тор­айғыров атындағы университет студенттері Жамал Қалиева мен Мәдина Қасқыр­баеваның жұмыстарына арнайы сертификат табыс етіл­ді. Іскер студент Жамал бұл табыс олардың дизайнер мамандығын таңдаудағы ал­ғашқы жеңістері және тынымсыз шығармашылық ең­бектің, ойдың арқасы дейді. Дизайнер мамандығын қазақ жастары енді-енді таңдап, үйреніп келе жатқанымен,оның негізі тереңде – біздің апа-әжелеріміздің қолдарынан шыққан қазақ киімдері, оюлар, құрақ көрпелер – ойдан, шеберліктен туған. Сондықтан, қазіргі заман тілімен айтқанда, бүгінгі күннің дизайнері, яғни киім үлгілерін жасаушы адамға алдымен дарын, қабілет және креативті ерекше ойлау мүмкіндігі қажет. – Қазір біздің ойымызда осы күнгі өмірдің креативтілігі мен заманауилығын бейне­лейтін киім үлгілерін жасау идеясы бар. Біз ұлттық құндылықтарымызды әлемге паш ететін таңқаларлық киім үлгілерін жасағымыз келеді, – дейді Жамал мен Мәдина. – Әрине, студенттерімізге үйрету, оқыту – біздің парызы­мыз. Қыздарымды Алматыға бай­қауға жібергенде олардың да­­рынды қабілеттеріне сендім,  – дейді ұстаздары, Қазақстан Сурет­шілер одағының мүшесі Майса Ықыласова. Фарида БЫҚАЙ, «Егемен Қазақстан». ПАВЛОДАР.