АЛМАТЫ
Қазақстан Еуропадағы қауіпсіздік және ынтымақтастық ұйымының іс басындағы төрағасы ретінде Қырғызстандағы жағдайды тез арада қалпына келтіру үшін қажетті шараларды қолға алып, көмек қолын созуда. Сонымен қатар көршілес туыс мемлекет ретінде оның экономикасын барынша қысқа мерзімде қалпына келтіру мақсатында бірқатар жұмыстар атқарылуда. Оған Мемлекет басшысы Нұрсұлтан Назарбаевтың қиын да күрделі жағдайға тап болған Қырғыз Республикасын осындай кезеңде қолдау үшін арнаулы гуманитарлық қор құру туралы ұсынысы айқын дәлел бола алады.
Елбасы бүгінгі күн тәртібінде тұрған мұндай маңызды мәселе жөнінде жақында Алматыда өткен ЕҚЫҰ сыртқы істер министрлерінің бейресми кездесуінде атап айтқан болатын. Соған орай Қазақстан Үкіметі көршілес Қырғыз Республикасына гуманитарлық көмек көрсету туралы шешім қабылдап, 11 миллион АҚШ долларына жуық қаражат бөлді.
ҚР Төтенше жағдайлар министрі В.Божконың айтуынша, Үкіметтің осы қаулысы аясында қырғыз ағайындарға көп мөлшердегі түрлі тауарлар жіберу жоспарланып отыр. Тұрмысқа аса қажет бұл тауарлардың арасында жылу электр стансасын шикізатпен қамтамасыз ету үшін көмір, құрылыс материалдары – ағаш, металл прокаты, шатырға арналған материалдар және әрине өте мол көлемдегі азық-түлік те бар. Төтенше жағдайлар министрлігінің осындай ұйғарымын орындау мақсатында Мемлекеттік материалдық резерв бойынша комитет республикалық мемлекеттік “Резерв” кәсіпорнына жоғарыда көрсетілген бұл тауарларды мемлекеттік материалдық резерв қорынан шығаруды бұйырған болатын.
“Бүгінде “Резерв” республикалық мемлекеттік кәсіпорнының Алматы филиалы Қырғызстанға ауқымды көлемдегі күрішті арнаулы жүк мәшинелеріне тиеп жіберуде”, дейді филиал директоры Бейбіт Ибрашұлы өз ойын ортаға салып. Анығырақ айтқанда, келешекте 47 вагоннан тұратын теміржол құрамын жіберу жоспарлануда. Ал мұның, яғни жүктің ауқымы өте үлкен болғандықтан оны жөнелту Төтенше жағдайлар министрі В.Божконың бақылауында болмақ.
Сондай-ақ, министрдің тікелей тапсырмасы бойынша Төтенше жағдайлардың Алматы гарнизонының қосымша құрамы да іске қосылады. Жүк тиеуге арналған вагондарды “Қазақстан темір жолы” ҰК-ның Алматы темір жол басқармасы шұғыл түрде ұсынбақ. Сонымен, Қырғызстанға Қазақстан халқының көмегі уақытында жеткізілетіндігіне сенім мол.
Бақыт БАЛҒАРИНА.
* * *
СЕМЕЙ Біріне-бірі жалғасқан саяси дүрбелең мен ағайынаралық жанжалдардың салдарынан бүгінде экономикалық және әлеуметтік жағдайы тығырыққа тіреліп отырған Қырғыз Республикасына біздің мемлекетіміз тарапынан материалдық тұрғыда он миллионнан аса АҚШ доллары көлемінде көмек көрсетілетіні белгілі. Соған орай жуырда Қырғыз еліне аттандыруға Семейден 4 вагон құрылыс және шаруашылық тауарлары тиелді. Мұның басым бөлігі осында өндірілген құрылыс материалдары. Соның ішінде Семей шиферінің орны бөлек. Мұның сыртында ағайындарға арналған сәлемдеме құрамында түрлі азық-түлік бар. – Мұндай сәлемдемелер республика бойынша бір жерге жинақталып, сонсоң тиісті жерге жөнелтілетін болады. Бірақ бұл игілікті істе еш кідіріс болмайтындығына сенімдіміз, – дейді “Балқаш” республикалық мекемесінің осындағы филиалының басшысы Нұрбек Сағадиев. Сөз соңында мұндай көмек еліміздің мемлекеттік материалдық резервінен жасалып отырғанын айта кеткеніміз жөн болар. Төскейде малы, төсекте басы қосылып жатқан қырғыз ағайындарға көмек осылайша өз жалғасын табуда. Дәулет СЕЙСЕНҰЛЫ.
