Жамбыл ескерткіші Ұзынағаш ауылында ашылды

Жамбыл бабаның еңселі ескерткіші Ұзынағаш ауылын­да­ғы Абай көшесінде бой көтерді. Ескерткіштің ашылу салтанатында облыс әкімі Серік Үмбетов сөйлеп, халық поэ­зия­сының тұғыры берік тұлғасы, өлең сөздің дүлдүлі Жамбыл бабамызға өзінің атындағы аудан орталығында ескерткіш ор­натылуы ақынға деген зор құр­мет екенін атап айтты. Мемлекет басшысы Нұрсұлтан Әбішұлы Назарбаевтың “Өрке­ниет­ті ұлт, ең алдымен тари­хы­мен, мәдениетімен, ұлтын ұлық­таған ұлы тұлғаларымен басқа­лар­ға танылады” дегенін біз әрдайым жадымызда ұстаймыз. Міне, кө­рік­ті алаңда ақынның тұғырлы тұл­ғасы бой көтеріп, ұрпағына рух беріп тұр. Мұның өзі мәде­ниет­ке, өнерге, тағы­лымды тари­хымызға ден қою деген сөз. Сон­дықтан қолға алын­ғанның бәрі осы биік мақсат барысында жал­ға­сын тауып келеді, деді ол. Әкім сондай-ақ жақын күндері Тал­дықорғанда ақиық ақын Сүйінбай бабаға ескерткіш ашылатынына жұртшылықтың назарын аударды. Бұдан соң жазушы Орысбай Әбділдаев Махамбет пен Абай­ды, Жамбылды қазақ елінің төлқұ­жа­ты, асқақ абыройы деп тану қа­жет­тігін айта келіп, тебіреністен ту­ған өзінің жыр шумақтарын толғады. Жамбылдың немересі Әлімқұл Тоққұлыұлы көпшілікке ата дәс­түріне сай ақ батасын берсе, “Жам­был ата келіндері” ансам­блін­дегі әжелер шашуын шашты. Жиналған қауым “Құлансаз” фольклорлық-этнографиялық ән-би ансамблінің кең көлемді кон­цертін тамашалады. Күмісжан БАЙЖАН. Алматы облысы, Жамбыл ауданы.