Жаңа құрылыстар қанат жаюда

Ақмола облысының әкімі Целиноград ауданындағы Родина ауылындағы қоныс тойларына қатысып, қуаныш иелерін құттықтады. Ол жергілікті тұрғындармен бірге, алғашқы 4 отбасының бірі болып жаңа үйдің кілтін алған Ерлан Тасбо­­­ла­­товтың шаңырақ шаттығының куәсі болды. – Қазақстан Президенті Нұрсұлтан Әбішұлы Назарбаевтың халық тұрмысын жақсарту бағытындағы саясатының арқа­сында шал­ғай елді мекендерде де заманауи жаңа үйлерге қолжетімділік орнықты. Шаңы­рақтарыңыз шаттыққа толып, отба­сы­лық берекеге бөленіңіздер. Бүгін өз атым­­нан Тасболатовтың отбасына теледи­дар сый­лаймын, – деді облыс әкімі С.Кула­гин. «Родина» агрофирмасы» ЖШС бас директоры, Қазақстанның Еңбек Ері Иван Сауэрдің айтуынша, ауылда «Нұрлы Жол» бағдарламасымен 2016 жылдың бірінші жартыжылдығында 14 үй пайдалануға беріледі. Қазіргі күні тоғыз ғимаратта ішкі әрлендіру жұмыстары жүргізіліп жатса, қалған бесеуінің қабырғасы көтеріліп қалды. Сонымен бірге, агрофирма басшысы И.Сауэр облыс әкімі мен журналистерді 1000 бас сауын сиырына арналған мал шаруашылығы кешені құрылысының барысымен таныстырды. Жобалық құны 1 миллиард 10 миллион теңге тұратын бұл нысан үстіміздегі жылдың бірінші тоқсанында іске қосылады деп күтілуде. Жаңа құрылыстар қарқын алған шаруашылықта өскелең талаптарға толық сай келетін астық терминалы салынып жатқанын көрдік. Сыйымдылығы 20 000 тонналық терминалда астықты тазалау, кептіру, сақтау және нарыққа шығарудың кластерлік жүйесі қамтамасыз етіледі. Бақберген АМАЛБЕК, «Егемен Қазақстан». Ақмола облысы, Целиноград ауданы.