Жаңа басшыдан іскерлік күтіледі

Атырау жұртшылығы да әр жылдары өңірді басқарған әкімдердің жұмысын іскерлік тұрғысынан бағалайды. Өткен сенбіде Елбасы Жарлығымен Атырау облысының әкімі болып тағайындалған Нұрлан Ноғаевтың да іскерлік танытатынына бек сенеді. Премьер-Министр Кәрім Мәсі­мов облыс активіне таныс­­тырған аймақтың жаңа басшысының осы қырына тоқталып өтті. Жиынға Президент Әкімшілігінің Басшысы Нұрлан Нығматулин қатысты. Ал К.Мәсімов облысты 4 жылға жуық басқарған Бақтықожа Ізмұхамбетовтің жаңадан жұмысын бастаған VI шақырылымдағы Парламент Мәжілісінің Төрағасы болып сайланғанын хабардар етіп, ол жетекшілік еткен жылдары өңірдің әлеуметтік-экономикалық өркендеуіне өз үлесін қосқанына тоқталды. Осыған байланысты Ел­басының отандық экономика үшін стратегиялық маңызы айрық­ша зор облысты басқару жөніндегі таң­дауы Нұрлан Ноғаевқа түсіп отыр. Мұндай таңдау жасаудың бірнеше себебі бар. Біріншіден, Нұр­лан Ноғаев – бірнеше маман­дықты меңгерген, бірнеше тілді біледі. Оның негізгі мамандығы – мұ­найшы, демек, Атырау секілді бір ға­сыр мерзімнен бері «қара ал­тын» өндірілетін өңір экономи­ка­сы­ның жетекші саласымен жете таныс. Олай дейтініміз, он жылдай, яғни 1996-2006 жылдары осы саладағы отандық және шетел­дік инвесторлармен бірлесе құрыл­ған кәсіпорындарда да, тіпті, Энер­ге­тика және минералды ресурстар министрлігінде де жұмыс істеп, та­биғи байлықты ел игілігіне жара­тудың қыр-сырына қаныққан деуге болады. Екіншіден, мемлекеттік бас­қаруда да толымды тәжірибе ж­ина­ған. Нақтылай айтқанда, 2007 жыл­дан бері Батыс Қазақстан облы­сының басқару саласында әуелі облыс әкімінің орынбасары, кейін бірінші орынбасары лауазымында болған. Ал соңғы 4 жылдан бері Ақжайық елі атанған өңірді абыройлы басқарды. Осы тұрғыдан айтқанда, Ел­басы тарапынан Атырау өңірі­нің басқару тізгінін қолға алған жаңа әкімге артылатын сенім де, жүк­телетін жауапкершілік те жоғары екені аңғарылады. Өйт­кені, өзге өңірлер секілді Атырау­дың да эко­номикасын әртарап­тан­дыру мәсе­лесі өзінің маңызын жоймай­ды. Сонымен бірге, өңір­де әлі ше­шімін күткен күрделі мә­селелер жеткілікті. Үкімет басшысы жаңа басшы­ның қойнауы «қара алтынға» толы Атырау экономикасын өркен­детуде, Елбасы тапсырмаларын жер­гілікті жерде табысты іс­ке асы­руда тәжірибесінің жеткілік­тілі­гіне тоқталды. Жолдасбек ШӨПЕҒҰЛ, «Егемен Қазақстан». АТЫРАУ.