Патриот жастар жиыны

Қоғам жұмыла еңбек етіп, бірлік пен ынтымақтың арқасында өзгеретіндігі әлімсақтан аян. Бүгінгі күні елімізде көптеген жастар ұйымдары белсенді жұмыс атқарып келеді. Мәселен, «Нұр Отан» партиясының жанынан құрылған «Жас Отан» жастар қанаты қоғамдық-саяси жұмыстардың көшбасшысы болып, жастардың белсенділігін арттыруға атсалысып келе жатса, «Жасыл Ел» еңбек жасақтары тазалық, көгалдандыру жұмыстарына жәрдем ете отырып, табиғатты қорғауға үлкен үлес қосуда. Ал Қазақстан Студенттер альянсы, Қазақстан Жастар конгресі студент жастардың әлеуметтік-экономикалық, құқықтық және тұрмыстық мәселелерін шешуде жас­тарды қолдау жөніндегі жобалар әзірлеп, олардың жүзеге асуына бастамашы болып отыр. Ендеше, еліміздің ертеңіне бей-жай қарамай­тын белсенді жастары Тәуелсіздіктің 25 жылдық мерейтойы мен Алматы қаласының 1000 жыл­ды­ғына орай «Болашағы жарқын Мәңгілік Елдің жастары» деген атпен республикалық пат­риот жастар форумында бас қосты. Алматы қала­сы жастар саясаты басқармасы мен Қазақ мем­лекеттік қыздар педагогикалық универ­си­тетінің ұйымдастыруымен өткен жастар форумына республиканың әр өңірінен 100-ден астам жастар ұйымдарының өкілдері мен Жастар ісі жөніндегі комитет төрағалары,  #G38 ұйымы, Алматы қаласы студенттер альянсы, «Жасыл Ел» жастар еңбек жасақтары, Қазақстан халқы Ассамблеясының «Жарасым» жастар канаты, «Алматы еріктілер лигасы», «Сұңқар» студенттер кәсіподағы  қатысты. – Жас келсе – іске» дейді халық. Мыңжылдық тарихы бар ару Алматының төрінде студенттердің өзін өзі басқару жұмыстарын жетілдіруге арналған ұсыныстарын талқылау үшін бас қосып отыр­ғандарыңызға қуаныштымын! Елбасы өз Жол­дауында «Мен жастар – біздің бола­шағы­мыздың тірегі дегенді әркез айтып келе­мін. Мемлекет жаңа буынның алдында ба­рлық есіктер мен жолдарды ашты! «Нұрлы Жол», міне, біздің креативті ырғақты жастары­мыздың күш-жігер жұмсап, құлаш сермей­тін тұсы осы. Сіздердің жалындаған күш-қуат­тарыңыз бен алғыр ойларыңыз тың жаңа­лық­ты енгізуге мүмкіндік береді. Елбасы айт­қан­дай, «Терең білім – тәуелсіздігіміздің тіре­гі, ақыл-ой – азаттығымыздың алдаспаны». Білім­дері­ңіз сапалы, қабілеттеріңіз қарымды, пайым-па­ра­саттарыңыз терең болсын! Мәңгілік Ел­дің көшін бастайтын да, түзейтін де, дамыған ел­дер­дің деңгейіне жеткізетін де – сіздерсіздер! – деді Қазақ мемлекеттік қыздар педагогикалық универ­ситетінің ректоры Динар Нөкетаева форумның ашылуында. Алматы қаласы жастар саясаты басқар­масы­ның бас­шысы Нұрлан Сыдықов студенттік өзін өзі бас­қару жүйесін дамыту бағытында ұйым­дас­ты­ры­лып отырған басқосу ең алдымен тәжіри­бе ал­ма­­су үшін, атқарылған жұмыстарды қорытын­ды­­лап, жоспарды айқындап алу үшін қажеттігін атады. Форумның пленарлық мәжілісі түстен кейін  студенттік өзін өзі басқару органдары мен сту­денттік жастар ұйымдарының қызметінің тиім­­ділігін аттыруға арналған жиынға ұласты. Топ­­тық дискуссия түрінде өткен жиын соңында ұсы­ны­стар мен пікірлер негізінде жастар ұйым­­дары­ның жұмысын дамытуға арналған тұжы­рымдама бекітілді. Айнаш ЕСАЛИ, «Егемен Қазақстан» АЛМАТЫ