Талдықорғанда 168 отбасы үйлі болды. Мұның бәрі Тұрғын үй құрылыс жинақ банкінің салымшылары есебінен салынған 1 және 2 бөлмелі пәтерлер. «Арлан жоба» ЖШС-нің жобасы бойынша «Жетісужилсоцстрой» ЖШС тұрғызған 5, 6, 7 қабатты үйлердің құрылысы 2014 жылы басталыпты. Жалпы алаңы 11 мың шаршы метрге жуықтайтын үш үйді тұрғызуға 1 млрд теңге жұмсалған. Нысандар жоспарға сай қолданысқа беріліп отыр. Және сапасы жағынан да талаптарға толықтай жауап береді. Құрылыс барысын техникалық жағынан бастан-аяқ қадағалап отырған «Krav Инженеринг» ЖШС өкілдері осындай мәлімет беріп отыр.
Көптің қуанышына ортақтасып, пәтер кілтін табыстауға Алматы облысының әкімі Амандық Баталов пен «Қазақстанның тұрғынүйқұрылысжинақ банкі» АҚ басқарма төрайымы Ләззат Ибрагимова қатысты.
Өңір басшысы құттықтау сөзінде:
– Елбасының халықты тұрғын үймен қамтамасыз ету туралы тапсырмасына сәйкес облыста ауқымды жұмыстар атқарылуда. Облыс орталығы да жаңа салынып жатқан үйлердің есебінен күннен күнге көркейіп, өсіп келеді. Жаңа пәтерге қол жеткізіп отырғандарыңыз соның дәлелі. Алдағы уақытта да халықты баспанамен қамтамасыз ету жұмыстары жүйелі атқарылатын болады, – деп сендірді.
Соңғы жылдары Тұрғын үй құрылыс жинақ банкіне деген сенім артқан. Жоғарыда айтқан 43 мың салымшы соның дәлелі. Олардың 20 мыңы облыс орталығында тұрса, қалғандары елді мекен тұрғындары. Ләззат Ибрагимованың айтуынша, бұл – өзгелерге үлгі боларлық көрсеткіш. Ал Қазақстанның «тұрғынүйқұрылысжинақбанкі» АҚ облыстық филиалының директоры Ғалымжан Шалғынбаевтың сөзіне жүгінсек, «Салымшылардың дені дәрігерлер, мұғалімдер, қарапайым еңбек адамдары, мемлекеттік қызметкерлер, тағы басқа санаттағы азаматтар. Орташа табыс иелері. Соған қарамастан тұрмыстан қаржы үнемдеп, оны банктегі есепшотына аударып, кезегі келгенде тұрғын үйге ие болуға үмітті», дейді.
Банк бүгінге дейін облыс орталығында ғана тұрғын үй салумен айналысып келсе, бұдан былай «Нұрлы жер» бағдарламасы аясында мұндай жұмыстар барлық аудандарда қолға алынбақ. Бұл жайлы Ләззат Ибрагимова айтты.
«Тұрғынүйқұрылысжинақбанкі» АҚ осыған дейін өңірлерді дамытудың 2020 жылға дейінгі бағдарламасына сәйкес облыста 74,1 мың шаршы метр тұрғын үй салған. Соның ішінде «Тұрғындардың барлық санатына арналған тұрғын үй» бағыты бойынша 41,1 мың шаршы метрлік 12 үй (609 пәтер) салынса, «Жас отбасыларға арналған тұрғын үй» бағыты бойынша 33 мың шаршы метрлік 7 үй (593 пәтер) пайдалануға берілген. Ал биыл 6 үй салу жоспарланған, оның төртеуі Талдықорғанға тиесілі.
Пәтер кілті табысталардан бір сағат бұрын екі тарап жаңа келісімге келгенін де айта кету керек. Жаңа жоспарда – облыс орталығында «Нұрлы жер» бағдарламасы бойынша салынатын екі қабатты 607 коттедждің құрылысы тұр (оның 48-і биылғы жылдың соңына дейін қолданысқа беріледі). Ол үшін облыс әкімдігі 100 гектар жер бөлген. Дайындық жұмыстары жүріп жатыр. Банк тарапы жетісулықтардың бұл бастамасына ерекше ден қойып, қолдау танытуға дайын. Осы мақсатта облыстық әкімдікте облыс әкімі Амандық Баталов пен «Қазақстанның тұрғын үй құрылыс жинақ банкі» АҚ басқарма төрайымы Ләззат Ибрагимова екіжақты ынтымақтастық келісімге қол қойды.
Алмас НҮСІП, «Егемен Қазақстан»
Алматы облысы