Құрлықтық хоккей лигасының (ҚХЛ) кезекті тур ойынын Хабаровскіде өткізген «Барыс» жергілікті «Амур» командасынан жеңілді.
Астаналық хоккейшілер ойынды өте қарқынды бастады. Кездесудің 3- минутында Кертис Волк гол соғып, «Барысты» алға шығарды. 14-минутта таразы басы теңесті. Бұл голдың авторы – Игорь Руденков. Үзілістен кейін қос команданың ойыншылары жиі-жиі шабуылдағанымен, бір-бірінің қақпа кілтін таба алған жоқ. Дәл осы жағдай үшінші кезеңде де қайталанды. Тек бәсекенің аяқталуына екі минуттай уақыт қалғанда Томаша Загорна нысананы дәл көздеп, жергілікті жанкүйерлерді қуантты. Есеп – 2:1.
Бұл күндері ҚХЛ-дың тұрақты біріншілігінің жарыс кестесінде «Барыс» 8-орынды иеленуде. Олар 36 ойыннан кейін 50 ұпай жиды. Бүгін жерлестеріміз Қытайға сапар шегіп, «Куньлунь Ред Стар» клубымен күш сынасса, одан кейінгі үш кездесуді Астанада өткізеді.
Ғалым СҮЛЕЙМЕН,
«Егемен Қазақстан»