2025 жылдың 1 маусымындағы жағдай бойынша Қазақстанда тіркелген автокөліктердің жалпы саны 6,3 миллионға жетті, деп хабарлайды Egemen.kz Ұлттық статистика бюросына сілтеме жасап.
Тек мамыр айында ғана елде 128,1 мың көлік тіркелген. Бұл көрсеткіш өткен жылдың сәйкес кезеңімен салыстырғанда 15 пайызға көп. Оның ішінде 113 мыңы жеңіл автокөліктер. Сонымен қатар, мамыр айында 8 мың жүк көлігі және 1,4 мың автобус жолға шыққан.
Бүгінгі таңда Қазақстан халқының саны 20,33 миллион адамды құрайды. Демек, әр үшінші қазақстандықтың атына көлік тіркелген.Экологиялық көлікке деген қызығушылық артып келеді. 2024 жылдың мамырымен салыстырғанда электромобильдер саны 66,9 пайызға өскен.
Сонымен қатар, жанармаймен жүретін көліктер де әлі де сұранысқа ие:
Бензинмен жүретін көліктер – +15,3%; Дизельмен – +13,9%; • газбен – +36,2%; Аралас отынмен – +9,3%.Төрт айда жарты миллионнан астам көлік тіркелген. 2025 жылдың 1 ақпанына дейінгі есеп бойынша елдегі көлік саны бір жыл ішінде 7,6 пайызға өскен. Бұл кезеңде 5 775 499 көлік тіркелген:
Жеңіл көліктер – 5 068 227; Жүк көліктері – 570 779; Автобустар – 116 493.Яғни, төрт ай ішінде ел автопаркі 526 987 көлікпен толыққан. Алматы қаласы көлік саны бойынша былтыр-ақ шектік деңгейге жеткен. Қала жолдарына күн сайын 1 миллионға дейін автокөлік шығады, олардың 600 мыңы – қалада тіркелген, ал 400 мыңы – облыстан келеді.
Сарапшылар бұл мәселені шешу үшін ақылы автотұрақтарды кеңейтіп, қала ішіндегі қозғалысты шектеуді ұсынған. Бұл шаралар жолдағы жүктемені азайтып, экологиялық жағдайды жақсартуға көмектесуі керек еді. Алайда, автокөлік саны күн санап артып келеді.