Премьер-министрдің бірінші орынбасары Роман Скляр «Air Liquide» тобының вице-президенті Эмили Муран-Ренуармен кездесті. Кездесу барысында тараптар Павлодар мұнай-химия зауытының (ПМХЗ) аумағында сутегі өндіру қондырғысының құрылысы жобасын жүзеге асыру мәселесін талқылады. Аталған жоба 2026 жылдың қазан айында пайдалануға беріледі деп жоспарланған.
Сонымен қатар тараптар компанияның ел экономикасының басым секторларындағы қатысуын кеңейту жөнінде пікір алмасты. «Air Liquide» компаниясы біздің елге 2016 жылдан бері инвестиция салып келеді. Компания жүзеге асырған жобалардың жалпы көлемі 120 млн еуродан асады. Қазіргі уақытта Павлодар қаласында FOIK деп аталатын бірегей технологияны қолдана отырып, жаңа зауыттың құрылысы жүргізіліп жатыр. Инвестиция көлемі – 100 млн еуродан астам.
Сондай-ақ Роман Скляр «Шелл» компаниясының барлау және өндіру бөлімінің атқарушы вице-президенті Ричард Хаумен келіссөз өткізді. Кездесу барысында тараптар екіжақты ынтымақтастықтың қазіргі жай-күйі мен перспективаларын талқылады. «Шелл» компаниясы отандық мұнай-газ саласындағы ірі шетелдік инвесторларының бірі болып саналатыны, сондай-ақ Карашығанақ, Қашаған және КҚК сияқты маңызды жобаларға қатысатыны атап өтілді.
Тараптар Қарашығанақ газ өңдеу зауыты жобасына ерекше назар аударды. Аталған жоба ӨБК бойынша түпкілікті келісімшарттарының шеңберінде жүзеге асырылады. Өз кезегінде Ричард Хау «Қазақстанмен серіктeстігімізге 30 жылдан асты. Бұл біз үшін ерекше мақтаныш. Мен үшін Қазақстанға жаңа қызметтік мәртебемде қайта оралу – үлкен құрмет», деді.
Роман Скляр бұл жобаның стратегиялық маңыздылығын атап өтіп, оның іске асуын жеделдетудің қажеттігін жеткізді. Кездесу қорытындысында тараптар ұзақмерзімді әрі өзара тиімді ынтымақтастыққа ниетті екенін растады.