«Қайраттың» даңқы асқақтаған күн

Енді Алатау бөктеріне тек Еуропаның ғана емес, әлемге даңқы жайылған гранд клубтар ат байлайды. «Реал Мадрид», ПСЖ, «Манчестер Сити», «Барселона», «Бавария», «Ливерпуль», «Интер», «Боруссия» сынды азу тісі алты қарыс тегеурінді командалардың қайсысы «Қайратпен» бір топқа түсетіні бүгін анықталады. Қалай болғанда да Алматының «Орталық стадионы» қоңыр күзде әлем назарын өзіне қаратады.

Чемпиондар лигасының іріктеу кезеңіндегі матч жөнін­де бірер сөз. «Қайрат» пен «Сел­тик» тартысы туралы таңды таңға жалғап айтуға болады. Сырт­та­ғы ойында да, өз алаңы­мыз­да­ғы додада да жігіттер барын салды. Әрине, Дастан Сәт­баевтың Глазгодан сары қағаз «арқалап қайтуы» аламан алдында жанкүйерлердің көңі­лін түсіргені де рас. Дегенмен де білікті маман Радиктің ұлы Рафаэль Уразбахтин алма­ты­лық команданы асқан жауап­кершілікпен сайысқа салғаны көзге ұрып тұрды. Рас, экстра­ таймның соңғы минуттары сыр­ғып жатқан­да «Селтик» ойыншылары кәдімгідей қыспақ­­қа алды, тіпті алаңынан орта тайлы-таяғы­мен алып шабуылға көшті. Бірне­ше жой­қын соққыны «Қайрат» қақ­пашысы Темірлан Анарбе­ков (матчтың бас қаһарманы) қай­тарып отырды. 21 жастағы қазақ ұланының пенальти той­тарудағы әбжілдігі әлемнің назарында қазір. Атырауда туып, Алматыда шыңдалған қақпашы Темірлан Анарбеков 14 жасында «Қайрат» футбол академиясына ауысып келді. 2022 жылы негізгі құрамға өтті. Ал былтыр «Жеңіс» клубына жалға берілді. Жаратқан жұлдызыңды жағып, маңдайыңды жарқыратам десе, әп-сәтте ғана. «Қайраттың» сенім артар негізгі қақпашысы Александр Заруцкий жара­қат­танып, алаңға Анарбеков алғашқы минуттан шықты. Өзінің қарымы мен қабілетін паш ететін шақты талантты қақпашы қалт жіберген жоқ. Еурокубоктық матчтарда талай майдан көріп, әбден ысылған, топтық кезеңіне де керуен тартқан шотландиялық клубтың айбарынан ыққан да, сасқан да жоқ. Пенальти сериясын бастаған Адам Айданың бұрышты көздей тепкен соққысын қайтарды. Одан кейін Люк Маккоуэннің, Дайдзэн Майэданың да тепкен добын тоқтатты. Арне Энгельс пен Каллум Макрегордың голын тойтара алмады деп Темірланды сөгу әсте қисынсыз. Еурокубоктық аламанға жаңа араласып, бойын үйрете бастаған жас қақпашы үшін бір емес, үш пенальтиді қайтару – орасан жетістік. «Селтиктің» тәжірибелі қақпашысы талай дуды көрген ойыншы. Дания ұлттық құрамасының қақпасын қорып екі рет әлем чемпионатына, Еуропа біріншілігіне қатысқан саңлақ. Тәжірибелі қақпашы өзінен 17 жас кіші Темірланның талантымен шендесе алған жоқ.

Алматылық «Қайрат» сапынан Валерий Громыконың соққысы қақпа маңдайшасынан қайтса, Александр Мартыно­вич, Офри Арад, Егор Сорокин­нің тепкен пенальтиіне Каспер Шмейхель еш қауқар таныта алмады.

Тартыстан кейін «Селтиктің» бас бапкері Брендан Роджерс ойынға көңілі көншімейтінін де айтты. «Біздің жігіттер рас, өте сылбыр ойнады. Біз апта бұрын өз алаңымызда өткізген тартыста гол соғып, жеңісті жақындата түсуіміз керек еді, бұйырмады. Чемпиондар лигасының топтық кезеңінде ойнағымыз келді, бірақ бұл жолы біздің бағымыз да жанбады, бабымыз да кемшін соқты. «Қайрат» командасын жеңісімен құттықтаймын, алдағы тартыста сәттілік тілеймін. Өте тегеурінді ұжым. Жанкүйерлерге айрықша құрмет білдіреміз, біз үшін ат арытып келіп қолдау көрсетті. Оларды қуантқымыз келген, бірақ Чемпиондар лигасының деңгейі, талабы өте жоғары, соған сай ойын өрнегін көрсете алмадық. 

«Қайрат» футбол клубының бас бапкері Рафаэль Уразбахтин команданың негізгі мақсаты­ның бірі Чемпиондар лигасы­ның топтық кезеңіне шығу еке­нін де жасырмады. «Десе де біз дәл мұндай таңғажайып жеңіс­­ке жетеміз деп күн бұрын қуан­­ғамыз жоқ. Тіпті болмаған­да УЕФА Конференция лига­сын­да сынға түсудің өзі олжа дедік. Бірақ жігіттер қайрат танытты. Оларға мақсатымыз­­дың орындалғанын айтып құттық­тадым. Алдын ала тон пішіп, болжам жасағым келмейді. Дегенмен де бұл асу бізге – әлемнің таңдаулы клубтарына қарсы ойнауға орасан мүмкіндік тудырып отыр. «Селтикке» қар­сы матч алдында топтық кезеңде ойнайтын Еуропаның азулы клубтарының суретін шығарып, киім ауыстыратын бөлмеге іл­дірдім, бұл менің ­идеям еді. Жі­гіт­тер көрсін, бір белден ассақ алды­мызда қандай нығмет тұрға­нын сезінсе дедім. Жеңістен кейін ойыншыларға айттым «ал енді дайын болыңдар» деп. Бізге қан­дай клубтар қарсылас атанса да жан­кү­йер­лерді қуантуға бары­мызды саламыз», деді Р.Ураз­бах­тин.

Сейсенбіден сәрсенбіге ауған түнде алдас­пан ақын Әбділдә Тә­жі­баевтың да рухы шат болған шығар.

«Қайратым» деп мен жүрмін,

Қайрат қылмай сен жүрсің...

Шынымен-ақ болмай ма,

Мен қуанар жеңісің?» деп қамшылап еді кезінде футболшыларды. Алматылық клуб ел қуанар жеңісімен барша жан­күйерлерін желпіндірді.

Рас, ішкі чемпионатта бәсе­ке күшейіп, тартыс артпай коман­далардың өсіп, еуропалық клубтарымен шендесе алмасы айдан анық. Дейтұрғанмен де ел футболының жылнамасында жаңа парақ ашылды. Еркін Тапалов сынды саңлақтарды сүйеніш тұтып енді «Қайрат» футбол академиясының түлектері Дастан Сәтбаев, Темірлан Анар­беков, Дамир Қасаболат, Рамазан Бағдат, Олжас Байбек сынды жас оғландар «Сантяго Бернабеу» («Реал Мадрид»), «Камп Ноу» («Барселона»), «Альянц Арена» («Бавария»), «Этихад» («Ман­честер Сити»), «Парк де Пренс» (ПСЖ) сынды әлемнің таңдаулы стадиондарында жасын ойнатады.

«Қайрат» футбол клубы Чем­пиондар лигасының топтық кезеңіне өткені үшін 18,62 миллион еуро (11, 7 млрд теңге) сыйақы алады. Алда әр матчта жеңіске жетсе – 2,1 миллион, тең ойнаса, 750 мың еуро мөлшерінде сыйақы аударылады.