Бүгін Алматыда «Қайрат» пен «Реал Мадрид» командаларының арасындағы футбол матчы кезінде жанкүйерлерге ыңғайлы болу үшін тегін автобустар жүреді, деп хабарлайды Egemen.kz.
Қала әкімдігінің мәліметінше, тегін автобус маршруттары орталық стадионнан матч аяқталғаннан кейін негізгі бағыттардағы соңғы аялдамаларға дейін жүреді. Барлығы 60 автобус жолға шығып, 6 нүктеге дейін қатынайды.
Сонымен қатар, қала метросының жұмысы түнгі сағат 01:00-ге дейін ұзартылады. «Байқоңыр» және «М.Әуезов атындағы театр» бекеттерінде матч өткізу кезінде жолаушылардың қауіпсіздігі мен сапалы қызмет көрсету үшін қызметкерлер саны күшейтіледі.