Алматыдағы Ұлттық кітапханада көрнекті жазушы Жұмабай Шаштайұлының туғанына 75 жыл толуына арналған әдеби жиын өтті. Қалам ұстаған қауым ұлт әдебиетіне айшықты қолтаңбасын қалдырған жазушыны құрметпен еске алып, әділет пен адамгершілікті тұтас ғұмырының өзегіне айналдырған қаламгер туралы естеліктер топтастырылған «Өзгермеген адам» кітабының тұсауы кесілді.
Тағылымды кештің өтуіне Жұмағаңның өзі әдебиет пен журналистикаға баулыған шәкірттері ұйытқы болған. Жазушының туған күнінде көпшілікке таныстырылған естелік жинақта Жұмабай Шаштайұлының кісілік келбеті, адами ажарына дақ түсірмеген парасаты мен қарпайымдылығы қаламдастары мен шәкірттері тарапынан жылы көрініс тапқан. Сондай-ақ жаңа туындыда қаламгердің өмір жолы, шығармашылық ұстанымы, замандастарының естеліктері мен сирек архивтік материалдар да қамтылған.
Ақын Ұлықбек Есдәулет тізгіндеген рухани кеште Архив, құжаттама және кітап ісі комитетінің төрағасы Рустам Әли Мәдениет және ақпарат министрі Аида Балаеваның жазушы шығармашылығы хақындағы жылы лепесін жеткізді.
«Жұмабай Шаштайұлы – қоғам жүгін, ел мұңын көтерген мазмұны терең мақалалар, шоқтығы биік шығармалар жазып, ұлт руханиятына сүбелі үлес қосты. Соңынан еріп, қолына қалам ұстаған жастарға рухани әке болып, шәкірттерінің шырағын жақты, талантын ұштады. Ұлт мәдениетіне зор еңбек сіңірген осындай тұлғалардың есімін ұлықтау рухани сабақтастықтың, елдіктің белгісі» делінген құттықтау хатта.
Басқосуда Жазушылар одағы төрағасының орынбасары Ғалым Қалибекұлы, ұлт прозасына «Аспанқора», «Құралайдың салқыны», «Қызыл қар», «Аяз би» секілді сүбелі шығармалар сыйлаған қаламгердің жазу өнеріндегі жарқын жолы туралы айта келіп, «Қазақ әдебиеті» газеті Жұмағаң басқарған жылдары ерекше мазмұнмен жарық көргенін атап өтті.
Ал әдебиет сыншысы Бекен Ыбырайым: «Проза тарихында бірден өз бетін айқындап, өнімді жолға түскендер де, бертінге дейін әрқилы ізденістер өрісін шарқұрып шарлап, өзін-өзі сынап барып, табыстарға жеткендер де аз емес. Жұмабай Шаштайұлын бірден-ақ өз жолын тапқан бақытты қаламгерлердің қатарына қосар едік. Шығармашылық нысанасын бірден айқындап, түрлі измдерге еліктеп-солықтамай, шындықты алтын арқау етіп таңдады да, сол бағытта өзінің көркемдік әлемін жасады. Ол қай шығармасында болсын, ең алдымен ел өміріндегі айтулы өзгерістерді, адамдардың тағдырын, табиғатын, қарапайым тіршілігін қаламына өзек етті», деп еске алды.
Жазушы туған топырақ Жамбыл ауданы жұртшылығының ықыласын ала келген аудан әкімі Нұрлан Ертасұлы, жерлестері Жұмағаңның әдебиет пен журналистикадағы өнегесін мақтан тұтатынын, оның шығармашылық еңбектері ұрпаққа мұра екенін атап өтті.
АЛМАТЫ