«Amanat» фракциясы: сайлаушыларға берген уәде орындалады

Сондай-ақ фракция мүше­лері Президенттің сайлауалды бағдарламасының, Жолдау­ларының, сондай-ақ «Amanat» партиясының сайлаушыларға берген уәделерінің орында­луын қаржыландыру жөнінде мемлекеттік органдардың жоспарын тыңдады.

Мәжіліс спикері, «Amanat» партиясының төрағасы Ерлан Қошанов қаралған заң жобалары еліміздің алдағы үш жылдағы даму бағытын айқындайтынын ерекше атап өтті. Оның айтуынша, инфрақұрылымдық жобалар­ға, өңірлерді дамытуға, бизнес­ті қолдауға, өзге де бағыттар­­ға қомақты қаражат бөлініп келе­ді. Үшжылдық бюджет айқын әлеуметтік бағытты сақтап отыр. Депутаттық корпус пен құзыретті мемлекеттік органдар бюджет қаражатының тиімді әрі уақты­лы игерілуін мұқият қадағалау­ға тиіс, әр теңге халықтың игілігі мен еліміздің дамуы жолында жұмсалуы керек.

– Экономикада нақты өсімі бар, жаңа жобалар жүзеге асырылып жатыр. Мемлекет азаматтар алдындағы әлеуметтік міндеттерін толық орындап отыр. Экономиканы әртараптандыру бойынша жоспарлы жұмыс жүр­гізіліп келеді. Сондықтан рес­пуб­ликалық бюджет жобасын қол­дағанымыз жөн деп білемін. Прези­дент Жолдауы, оның сай­лауал­ды бағдарламасы және «Amanat» партиясының сайлау­алды бағдарламасы қаржымен қам­тылып, толық жүзеге асыры­луға тиіс. Бұл – партия мен Үкі­мет­тің халық алдындағы ортақ жауап­кершілігі, – деді Е.Қошанов.

Партия төрағасы бюджет жобасы айтарлықтай тұрақты екенін атап өтті. Жыл басынан бері халықаралық резервтер (алтын-валюта резерві және бағалы қағаздар) 25%-ға өсіп, 57 млрд долларға жетті. Ұлттық қордың көлемі 62 млрд долларды құрады. Биыл 9 айда ІЖӨ өсімі 6,3%-ды құрады. Қол жеткізген барлық жетістік – Мемлекет басшысының фискалдық саясатты жетілдіру саласындағы тапсырмаларын жүйелі түрде жүзеге асырудың нақты нәтижесі. Енді әр отбасы, әр адам оң өзгерісті сезінуі керек.

Сонымен қатар Мәжіліс спикері бюджет қалыптастыруға қатысты өзекті мәселелерге және Үкімет болашақта жұмысты жандандыруы қажет бағыттарға тоқталды. Атап айтқанда, көлең­келі экономикамен күресті күшейту, бюджет тәртібін қатаң­дату, жобалау-сметалық құжат­таманы уақтылы дайындау, сондай-ақ «Ауыл – ел бесігі», «Келешек мектебі» жобаларын қаржыландырудың жеткіліксіз көлемі мәселелеріне назар аударылды. Сондай-ақ ол жергілікті бюджеттердің резервін дұрыс пайдаланудың маңызына назар аударды. Олар жыл қорытындысы бойынша кіріс жоспарын айтар­лықтай асыра орындайды.

– Ең алдымен, бұл қаражатты басталған жобаларды аяқтау­ға жұмсау керек. Одан өзге мақ­саттарға арнауға болмайды. Жергілікті бюджеттер өз дербес­тігін түсінуге тиіс және орта­лықтан үнемі көмек сұрай бермеуі керек. Тағы бір резерв – бұрын басталған жобаларды қайта қарап шығу. Олардың арасында кейінге қалдыра тұруға болатын мақсаттар болуы мүмкін. Қаражатты қай тұста үнемдеп, өзге салаларға бағыттауға болатынын тұрғындардың өздері-ақ көріп, айтып отыр, – деді Мәжіліс спикері.

Депутаттар алдында сөйлеген Премьер-министрдің орынбасары – Ұлттық экономика министрі Серік Жұманғарин 2026–2028 жылдарға арналған рес­публикалық бюджетке Ұлт­тық қордан кепілдендірілген трансферт мөлшері жыл сайын 2,77 трлн теңге көлемінде ай­қындалғанын атап өтті. Вице-премьер «Amanat» партиясының сай­лауалды бағдарламасын жүзеге асыру бойынша қол жеткізілген нәти­желерге де тоқталды. Мәсе­лен, биыл 32 аудандық аурухананы материалдық-техникалық тұрғыда жабдықтауға 35,1 млрд теңге қарастырылған, ЖОО сту­дент­терінің шәкіртақысы 100%-ға өсті, 2,8 мың жас маманға жеңіл­дікпен ипотека беруге 25 млрд теңге қарастырылған, азаматтық қызметшілердің жекелеген санат­тарының жалақысы екі есе өсті және тағы басқа.

Өз кезегінде Қаржы министрі Мәди Такиев келесі жылға арнал­ған республикалық бюджет кірісі 23,1 трлн теңге деңгейінде болжанатынын айтты. Ал келесі жылы бюджет шығыны осы жыл­мен салыстырғанда 2 трлн тең­геге ұлғайып, 27,8 трлн теңгені құрай­ды деп жоспарланып отыр. Солай бола тұра, алдағы жылы әлеуметтік салаға 10,7 трлн теңге қаражат бағыттау жоспарланған, оның 6,8 трлн теңгесі – әлеуметтік төлемдер, ал 3,6 трлн теңге – білім беру және денсаулық сақтау салаларына қатысты шығындар.

Мәжілістегі Қаржы және бюджет комитетінің төрағасы Татьяна Савельева бұл бюджеттің басты ерекшелігі – тұрақтылық пен қабылданған міндеттемелерді орындау қажеттілігі арасындағы қатаң тепе-теңдік екенін атап өтті. Жалғасы жоқ немесе жобалық әзірлігі расталмаған барлық бастама бюджеттен алынып тасталды. Бұға қоса Ұлттық қордан нысаналы трансферттер тартылмайды. Енді бюджет көбіне өз кірістері есебінен қалыптасады. Бұл қадам оның макротұрақтылығын күшейтеді.

Фракция отырысы барысында Үкімет мүшелері депутаттардың сұрақтарына жауап берді. Атап айтқанда, инфляцияны тежеу, сыртқы қарызды азайту, экономиканы әртараптандыру аясын кеңейту, ішкі жалпы өнімді ұлғайту, Ұлттық қор қаражатын тиімді пайдалану, инвестициялық ахуалды жақсарту және өзге мәселелер қозғалды.

Жиын қорытындысында «Amanat» партиясы фракция­сының мүшелері ұсынылған бюджеттік заң жобаларын мақұлдау және оларға Мәжіліс­тің алдағы жалпы отырысында қол­дау көрсету туралы шешім қабылдады.