Дизель ме, химиялық сұйықтық па?

Атырауда мұнай өнімін жалған құжатпен заңсыз тасымалдаушы ұсталды «Заманың түлкі болса, тазы боп шал» қағидасын ұстанатындар әлі де бой көрсетіп қалады. Алай­да, олардың қулығын іске асыруына мемлекеттік кіріс­тер департаментіне қарасты эконо­микалық тергеу қызметі мен жергілікті полицияның жедел-іздестіру шарасы тосқауыл болды. Нақтысын айтқанда, бір­лескен шара барысында Атырау-Доссор күре жолының бойындағы «Қарабатан» уақыт­ша бекетінде «Daf Te 105Xf» маркалы тіркемелі автомашина тоқтатылды. Аталған автома­шинаны тексеру кезінде оның тіркемесінде 26 дана арнайы пластикалық ыдыстарға құйылған шамамен 26 000 литр сұйықтық анықталған. Жүктің ілеспе құжаттарын­да пластикалық ыдыстарда «Этиленглеколь» хи­мия­лық заты деп жазылған. Жүк жө­нелтуші ретінде «Granit» ЖШС көрсетілген. Бірақ, ыдыстарды ашқанда мұнай өнімінің (дизель жанармайы) иісі бар майлы сұйықтық анықталды. Осыған орай тіркемелі авто­көлік құралы арнайы тұраққа қойылды. Ал аталған жайт бо­йын­ша мемлекеттік кірістер депар­таментінің экономикалық тергеу қызметі Қылмыстық кодекс­тің 197-бабының 1-тар­ма­ғымен (Мұнайдың және мұнай өнiмдерiнің шығарылу заң­дылығын растайтын құжат­тар­сыз оларды тасымалдау, иемдену, өткiзу, сақтау, сондай-ақ мұнайды қайта өңдеу) сотқа дейінгі тергеу тіркелді. Бір таңданарлығы, жүкті жөнелтуші «Granit» ЖШС ел аумағында тіркелмегені белгілі болды. Демек, мұнда жалған құжаттар жасау қылмысының белгілері бар. Сонымен қатар, сотқа дейін­гі тергеу барысында көрсетілген жүк­тен үлгілер алынып, сарап­тама жүргізу үшін Атырау мұ­най өңдеу зауытының мамандары тартылды. Алдын ала беріл­ген қорытындыға қара­ғанда, тіркемелі көліктегі плас­тикалық ыдыстардағы сұйықтық «дизель жанармайы» болып табылады. Жолдасбек ШӨПЕҒҰЛ, «Егемен Қазақстан». АТЫРАУ