Қазақстандықтар қай кітаптарды оқиды, қай әншіні тыңдайды?

Сурет:kapital.kz «Кселл» компаниясы activ music, activ TV және activ ұсынатын Bookmate (OTT-сервистер) атты жаңа сервистер жұмысының алғашқы нәтижесін шығарды. БАҚ өкілдерімен өткен кездесу барысында «Кселл» АҚ бас атқарушы директоры Арти Отс атап өткендей, OTT-сервистер іске қосылғаннан бергі үш айда қосымшаларға жазылғандардың қатары 50 мың адамға жеткен. Жаңа сервистер арасында activ ұсынатын Bookmate ең та­нымал қосымша болып отыр: ақпан айынан бері 25 мың адам бұл қызметтің жазылушысы атанған. 18 мың адам activ music-ке жазылса, 6 000 қолданушы activ TV сервисінің көрермені болу туралы шешім қабылдаған. Қарап отырсақ, ұялы оператор абоненттеріне түрлі қызметті ұсынып қоймай, қандай кітаптар мен әншілер сұранысқа ие екенін де анықтап, біліп отырады. Мәселен, қазақстандық әншілер арасындағы activ music сервисінің ең көп тыңдалған трегі Қайрат Нұртастың «Байқа» әні болды. Ал Александр Воро­бьев­тің «Сумасшедшая» атты әні ресейлік орындаушылар арасында ең жиі тыңдалған ән ретінде танылды. Шетелдік әндер ішінде Drake ұсынатын «Hotline Bling» трегі ең көп тыңдалған екен. Сервистің ең танымал плейлистерінің рейтингін «аctiv TOP 30» бастады. Ал телеарналарды көруге мүмкіндік беретін activ TV сервисінің ең көп қаралған ТОП-3 тізімінде 31 арна, 7 арна және КТК көш бастайды. «Спорт» қосымша топтамасы да Kcell және activ абоненттері арасында танымал болып отыр. Алғашқы үш айдың қоры­тындысы бойынша activ ұсы­натын Bookmate серви­сінде қазақстандық қолданушы­лар­дың сұранысына ие бол­ған кітаптардың ТОП-10 ті­зімі анықталды. Рейтингтегі алғаш­қы орында ағылшын жазушысы Джоджо Мойестің «Сенен кейін» атты кітабы тұр. Екінші орынға Стейс Крамердің «Өзіме қол жұм­сағанға дейін 50 күн» ат­ты шығармасы жайғасса, аме­рикалық психолог Роберт Чалдинидің «Ықпал ету психологиясы» үшінші орыннан көрінді. Сол сияқты. «Түнгі барлау» (авторы Сергей Лукьяненко) және «Кремльдің бүкіл әскері» (авторы Михаил Зыгарь) кі­тап­тары ең жылдам оқылған шы­ға­рмалар атанды. Лев Тол­с­­тойдың «Соғыс және бейбіт­шілік» романы аталған уақыт ішінде үзінділері дәйексөз ретін­де ең көп келтірілген кітап болып танылды. Қысқасы, қазақстандықтар ұялы телефон арқылы Джоджо Мойесті оқып, Қайрат Нұртасты тыңдап, отандық телеарналарды қарағанды ұнатады. Айнаш ЕСАЛИ, «Егемен Қазақстан» АЛМАТЫ