Маңызды мәселелер сөз болды

Премьер-Министрдің бірінші орынбасары Бақытжан Сағынтаев Астана экономикалық форумына қатысу­шылардың бірқатарымен кездесті, деп хабарлады Премьер-Министрдің баспасөз қызметі. Колумбия университеті Жер институтының директоры Джеффри Сакс  пен Бақытжан Сағынтаев кездесу барысында экономиканы әртараптандыру, Қазақстандағы құрылымдық реформалар мәселелерін талқылады. SPRING Даму жөніндегі агент­тігінің (Сингапур) төрағасы Филлип Йео мен Премьер-Ми­нистр­дің бірінші орынбасары Син­гапурдың даму институтының Қазақ­станмен ынтымақтас­тығы үшін маңызды салаларды белгіледі. Колумбия университетінің экономика профессоры, Дүние­жүзілік экономикалық форумның Жаһан­дық бәсекеге қабілеттілік индексінің авторы Ксавьер Сала-и-Мартинмен кездесу барысында Бақытжан Сағынтаев Қазақстанда  2018 жылға дейін жаһандық бәсекеге қабілеттілік индексінің көрсеткіштерін жақсарту бойынша жүзеге асырылып жатқан шаралар туралы әңгімеледі. Сала-и-Мартин Қазақстанның бәсекеге қабілеттілігін жақсарту және біздің еліміздің орта және ұзақ мерзімді болашақта тұрақты экономикалық өсімге қол жеткізуі бойынша өзінің сарапшылдық пікірін білдірді. Экономикалық ынтымақтас­тық және даму ұйымы Бәсеке­лестік жөніндегі комитетінің төр­ағасы Фредерик Женнимен кездесуде экономиканы реттеуден монополияға қарсы реттеу жолымен бәсекелестікті қорғауға көшу мәселесі талқыланды. Бреттон-Вудсты жаңғырту комитетінің атқарушы директоры Марк Узан қазіргі қаржы архитектурасын жаһандық реформалау үдерісі туралы хабарлады. Премьер-Министрдің бірінші орынбасары сондай-ақ Нобель сыйлығының лауреаты Кристофер Писсаридес­пен, экономист Артур Лаффер­мен, профессор-доктор Клаус Мангольдпен келіссөздер жүргізді.