Ақпарат көздерінің мәліметінше, шабуыл Мәскеу уақытымен таңғы 05:30-да (Астана уақытымен 07:30) басталған. Екатеринбург тұрғындары аспандағы гүрілден соң, қатты жарылыс дауысын естіген.
Екатеринбургтің дәл орталығында орналасқан «Тринити» тұрғын үй кешеніне дрон келіп соғылған. Жоғарғы қабаттардың терезелері қирап, түтін шыққан. Көпқабатты үйден 50-ден астам адам эвакуацияланған. Кем дегенде төрт пәтерге зақым келген.
Иранның дроны Әзербайжан аумағына құлады: Шекараға әскер топтастырылып жатыр
Алдын ала мәлімет бойынша, қалаға Украинаның «Лютый» типті ұшқышсыз ұшу аппараттары шабуыл жасаған. Дронның бөлшектері мен ғимарат қасбетінің сынықтары оқиға орнынан 200 метр қашықтыққа дейін шашыраған.
Шабуыл салдарынан алты адам зардап шекті. Олардың бірі түрлі жарақаттармен ауруханаға жатқызылса, қалған бесеуі түтінге уланып, ауруханаға барудан бас тартқан.
Сонымен қатар Челябинск маңында да бірнеше жарылыс болды. Жергілікті билік инфрақұрылым нысандарының біріне жасалған шабуылдың беті қайтарылғанын, зардап шеккендер жоқ екенін айтады.
