Бірлескен жобалардың берері көп

Елбасы Нұрсұлтан Назарбаев «Ройял Датч Шелл плс» концернінің бас атқарушы директоры Бен ван Берденмен Шетел инвесторлары кеңесі аясында кездесу өткізді, деп хабарлады Президенттің баспасөз қызметі. Кездесу барысында қазіргі өзара іс-қимылдың бірқатар мәселелері, сондай-ақ, концерн қызметінің мейлінше перс­пективалы салаларындағы ынтымақтастық аясын кеңейту жолдары қарастырылды. Атап айтқанда, Нұрсұлтан Назарбаев компанияның Қашаған кен орнын игеру жобасындағы маңызды рөлін атап көрсетіп, Б.Берденді «Би Джи Групп» компаниясымен қосылу үдерісінің табысты аяқталуымен құттықтады. Қазақстан Президенті қазіргі кезеңде «Ройял Датч Шелл плс» біздің еліміздің мұнай-газ саласындағы аса ірі инвесторлардың бірі болып отырғанына назар аударды. Сонымен қатар, Мемлекет басшысы бұл саладағы ынты­мақтастықты одан әрі нығайту қажеттігіне тоқталды. Б.Берден өзара іс-қимыл­дың және инвестициялық жобаларды тиімді жүзеге асыру­дың деңгейі жоғары екенін атап өтіп, таяудағы кезеңде жалғастыратын жұмыстарына қатысты жоспарлары жөнінде айтты.