Ресейден келіп қазақша кітап оқуда

Байырғы Қазталов ауылы сан ұлттардың тату-тәтті мекені болып келді. Осыдан жарты ғасыр бұрын аудан орталығында түрлі ұлт өкілдері тұрды. Иә, қазіргі күнде түрлі себептермен бұл ұлт өкілдерінің пайыздық көрсеткіштері төмендегені шындық. Дегенмен, қазақ болып кеткен басқа ұлттың өкілдері бақуатты өмір сүруде. Соның бірі – Валентина Уварова апамыз. Қазақша сөйлеп кеткенде шүлдірлеп сөйлейтін шала қазақтарды орта жолда қалды­ратын апамызды ауыл тік тұрып құрметтейді десек, артық емес. Тіпті, апамыз ауылда ата-анасынан айырылған қазақ балаларына өкіл ана болып, оларды ер жеткізгенін де білеміз. Сол балалар бүгінде бір-бір шаңырақ иелері. Валя апамыздың 80 жастық тойының бел ортасында жүрді. Міне, бұл бауырмалдық, ұлы достық деуге болады. Ендігі айтпағымыз, апамыздың ұл-қыздары сонау Ресейдің орталықтарында тұрып жатыр. Бірақ олар жыл сайын өздерінің кіндік қаны тамған жерге келіп, бір аунап кетеді. Тек өздері ғана келіп қоймайды, балаларын да ертіп келеді. Соның айғағындай, жақында Валя апаның Иваново қаласынан қызы Надежда, Түмен қаласынан келіні Елена ұл-қыз­дарымен келіп, үлкен шаңырақты қуантып тастады. Ал олар шаңы­рақта ғана болып қоймай, рухани орталық – кітапханаға келуді де жыл сайын дәстүрге айналдыруда. Кітапхананың балалар бөліміне келіп, бүлдіршіндері Виктория мен Дениске қазақ тіліндегі кітаптарды оқытып, таныстырды. «Мына үшінші сыныпқа көшкен қызым Виктория мен ағамның ұлы Дениске және жеңгем Еленаға біздің кіндік қанымыз тамған туған жерді таныстыруды көздесем, екінші жағынан, қазақ деген дархан да кеңпейіл халықтың бай тілін, әдет-ғұрпын білгізу тағы бір мақсатым. Өйткені, жолдасым да Қазталов ауылында туып-өс­кен­діктен, екеуміз қазақ тілін жақ­сы білсек те, балаларымыз бұ­дан бейхабар ғой. Келгеннен бері Елена, Денис, Виктория да қазақтың кейбір сөздерін үйреніп қалды. Ал үйде анамыз Валя қонаққа келген немере-жиендеріне қазақша сөздер айтып қала береді. Үйреніп қалған дағды ғой» деп Надежда бір күліп қойды. Кітапханада Денис пен Вик­тория бар ынталарымен кітап­ханашы апаларынан қазақ тіліндегі кітаптарды алып, мазмұнын қы­зыға сұрап жатқанын байқадық. Осындай көріністі көргенде достықтың тіні жалғаса беретініне көзіміз жетті. Әсем БОЛАТ Батыс Қазақстан облысы, Қазталов ауданы