Автоөнеркәсіп көліктіні көбейтті

Соңғы жылдары әлемдегі экономикалық дағдарыс бірқатар өндіріс ошақтарының қарқынын бәсеңдеткені рас. Оның қатарында еліміздің автоөнеркәсіп саласы да бар. Мұндай жағдайға тек біздің ғана емес, өзге де дамыған елдердің автоөнеркәсіптері тап болып отыр екен. Бұл жөнінде Орталық коммуникациялар қызметінде болған баспасөз мәслихатында Инвестициялар және даму министрлігінің ресми өкілі Қайсар Жұмабайұлы айтты. Ресми өкіл экономикалық қиын­дықтарға қарамай автоөнер­кәсіп әлі де әрі қарай дами береті­нін жеткізді. «Канада, Арген­тина, Австралия, Ресей, Жапония, Өзбекстан сынды елдер де қазіргі күнде қазақ­стандық әріптестерінің күйін кешіп отыр. Әйтсе де, отандық автоөнеркәсіптер өндірісті шамалы баяулатқанымен даму жолын әлі де жалғастырып келеді. Мәселен, саланың ел экономикасындағы үлесі айтарлықтай. Нақты сан­дар­ға жүгінсек, биылғы бірін­ші жартыжылдықтың қорытын­дысы бойынша отандық авто­өнер­кәсiптiң Қазақстан эконо­ми­касындағы үлесi 36,6 млрд. теңгенi құрап отыр», деді Қ.Жұмабайұлы. Бұл жерде тек жеңіл авто­көлік­тер ғана айтылып отыр­маға­нын ескерткен ресми өкіл, елімізде тіркемелер мен ауыр маши­налар құрастыру ісі де жақсы жолға қойылғанын атап өтті. «Бұл өңдеушi өнеркәсiптiң бiрқатар негiзгi салаларындағы көрсет­кiштен көбiрек. Мысалы, автоөнеркәсiптiң iшкi жалпы өнiмге қосқан үлесi жеңiл өнер­кәсiп, қағаз өнеркәсiбi, фармацевтика, тоқыма өнеркәсiбi, электроника, жиһаз өндiрiстерiнен әлдеқайда жоғары болды», деген ол, автоөнеркәсіп саласы екінші жартыжылдықта тағы да нығая түсетінін жеткізді. Еліміздегі автоөнеркәсіптің дамуында мемлекеттік қолдаудың орны ерекше болып отырғанын айтқан спикер, өткен жылы бас­тал­ған жеңілдетілген автонесие жөнінде де әңгімеледі. «Өткен жылы жеңiлдетiлген автонесие мемлекеттiк бағдарлама­сы бас­тал­ған болатын. Содан берi жеке адамдар автокөлiк сатып ала бастады. Бүгiнгi күнге дейiн 6 757 адам автонесиенiң арқасында жаңа көлiк сатып алды. Бұл индустриялық-инновация­лық даму бағдарлама­сы ая­сында жүзеге асып отырған шара және жалғыз механизм емес. Бұдан да басқа бизнестi қолдау­ға ар­налған тетiктер бар», деді Қ.Жұмабайұлы. Ресми өкілдің айтқандарына ден қойсақ, отандық автоөнеркәсiп индустрияландырудың екiншi бес­жылдығының басым бағыт­тары­ның қатарына енгiзiлiпті. «Индус­трия­ландырудың екінші бес­­жыл­дығында, яғни 2015-2020 жыл­дарға арналған бағдарлама­да авто­өнеркәсіпке айтарлықтар көңіл бөлінуі тиіс деп жос­парлап отырмыз. Өйткені, бірінші бе­с­жылдықта бұл сала даму бойын­­ша алдыңғы қатарлы еке­нін толық дәлелдеді. Тағы да нақ­ты санға жүгінсек, бірін­ші бес­жыл­дық бойынша авто­өнер­кәсіп 4,8 есеге өскен», деп ойын толықтырды ол. Оның айтуына қарағанда, автоөнеркәсіптер қазіргі бес жылдықта өнімнің қазақстандық үлесін көбейтіп, кем дегенде 50 пайызға дейін жеткізуді мақсат етіп қойыпты. Ресми өкілдің иландырғаны, мұндай межені бағындыруға отандық автокәсіп­орындарының мүмкін­дігі бар екен. Мәселен, автомобильдердің қосалқы бөлшектерін өндіру мен салада жаңа жұмыс орындарын ашуды 3,5 есеге дейін арттыру көзделіп тұрғанын айтты. Бұлармен қатар, қазақстандық автоөнімдерді экспортқа шығару ісі де мықтап қолға алынып жатқан көрінеді. Нұрбай ЕЛМҰРАТОВ, «Егемен Қазақстан»