Басқарушы партия кадрлық резерв жасақтамақ

"Нұр Отан» партиясы кадрлық резер­він қалыптастыру жұмысын бастайды. Бұл – сайланбалы және партиялық лауа­зым­дарға жоғары кәсіби кадрларды ұсынудың жүйелі ресімі. Кадрлық резерв тәжірибелі әріптес­терімізден, бастауыш партия ұйым­дарының мүшелері мен белсенді жастардан, сондай-ақ, партия жақтастары қатарынан жасақталады". "Нұр Отан" партиясының хатшысы Наталья Годунова осылай деп мәлімдеді. Ол мақсатты топты, партиялық кадрларды орта­лық және жергілікті мемлекеттік органдарға ұсыну үшін резервті қалыптастыру кезең­дері мен мерзімдерін кеңінен түсіндірді. «Партиялық кадрлық резерв туралы» ережеге сәйкес, партия мүшесі емес, бірақ оны белсенді қолдаушыларды да резервке іріктеу мүмкіндігі қарас­ты­рылып отыр, мүшелігі жоқ партия жақ­тас­тары кадрлық резервтегі саны резервистердің жалпы санының 10 пайы­зынан аспауы тиіс. «Нұр Отан» партиясының кадрлық резерві екі деңгейде – республикалық және аймақтық деңгейлерде бекітіледі. – Қазіргі уақытта аймақтық резерв қалып­тас­тырылуда. Оған мәслихат депутат­ты­ғына, аймақтық саяси кеңестер, партия­лық бақылау комиссиялары (ПБК), Сыбай­лас жемқорлыққа қарсы іс-қимыл жөнін­дегі қоғамдық кеңестер (СЖҚІҚК) және пар­тияның басқа да органдарының мүшелігіне кандидаттар іріктеледі, – деді ол. Оның айтуынша, үміткерлер келесі квота бойынша іріктеледі: әр ауданнан – 10, қаладан – 12, облыс орталығынан 25 кандидаттан. Сонымен қатар, Н. Годунова партияның аймақтық кадрлық резервіне жалпы респуб­лика бойынша шамамен 3 мың адам енетінін жеткізді. – Республикалық резервтің негізі – аймақ­тық резервистер (әр аймақтан үш адам­нан артық емес). Республикалық резерв 2017 жылдың соңында қалыптастырылатын болады. Аймақтық партиялық кадрлық резервке ену үшін  кандидаттар 3 сатылы іріктеу жүйесінен өтуі қажет. Жүйе конкурс­тық ресімдер мен құзыреттерін бағалаудан тұрады. Кандидаттардың әрқайсысы кәсіби, партиялық және жеке сипаттары бойынша кешенді тексеруден өтеді. Мысалы, партия мүшелігі бойынша өтілі, жұмыс өтілі, білімі, партиялық қыз­мет­тегі сіңірген еңбегі бойынша талап­тар бар. Аталған талаптар резервтің әр дең­гейі сайын арта түседі, – деді партия хатшысы. Үміткерлердің қылмыс­тық және әкімшілік жауапкершілікке тар­тыл­мауы, сыбайлас жемқорлыққа жағдай жасай­тын теріс қылықтарының, алынып тас­тал­маған партиялық жазаларының бол­мауы жөніндегі талаптар әр деңгей үшін міндетті болып табылатынына да назар аударды. Бұған қоса, ол партиялық кадрлық резервті қалыптастыру үш ай бойы кезең-кезеңмен өтетінін мәлім етті. Партия хатшысының сөзіне қарағанда, резервке алынғандарды бекіткеннен кейін партиялық кадрлық резервті дамыту жұмы­сы жүргізілетін болады. Нақтылай айт­қан­да, олардың нақты іс-әрекеттерінің жос­пар­лары әзірленіп, бекіту және жүзеге асыру шаралары іске асырылады. Одан әрі Н.Годунова үміткердің резервте болу мерзімі 5 жылды құрайтынын айта келіп, партияның Орталық аппаратында және аймақтық, аумақтық филиалдарының аппараттарында (басшылықтан басқа) бос лауазымдық орындарға байқау негізінде қабылдау жүзеге асырылатынын жеткізді. Жолдыбай БАЗАР, «Егемен Қазақстан»