Жастардың жолын ашатын жоба

«Нұр Отан» партиясы жанында­ғы «Жас Отан» жастар қанатының бастама­сымен «Жастар кадрлық резерві» атты мансаптық сатыға көтерілуге құш­тар­лығы бар, жоғары кәсіби бас­қа­рушылық қасиетіне ие жастарға арналған дәстүрлі жобаның тетігі іске қосылған еді. 7 жыл ішінде жобаға 13 мыңнан астам азамат қатысыпты. Жобаны жүзеге асыру кезінде 404 үміткер ашық іріктеу мен тестілеуден, оқу модулі мен кәсіби білік­тілік бағалауынан, сонымен қатар, мемлекеттік органдар мен ұлттық компаниялардан тағылымдамадан өтті. Ал биылғы жылғы тіркеу 15 тамыздан басталып, 31 тамызда аяқталған жобаға қатысуға еліміздің барлық аймағынан 1215 үміткер ниет білдіріпті. Жобаның негізінде кадрлық резервті құруға арналған тиімді жүйені қалыптастыру, басқару кадрларын іріктеу, дайындау және оқыту жүзеге асырылады. Іріктеу кезеңінің қорытындысы бойынша 691 кан­дидат жобаның «Сұх­баттасу» кезе­ңіне шақырылды. Кеше аталған жобаның екінші кезеңіне өткен 20 үміткермен сұхбат жүргізілді. Олардың арасында «Нұр Отан» партиясы Астана қалалық филиалы төрағасының орынбасары Владислав Сергеев, «Жас­тар кадрлық резерві» жобасының үйлес­тірушісі Әнуар Жақыпов, Білім және ғылым министрлігі Жастар саясаты де­партаменті әлеуметтік басқармасы­ның басшысы Алмагүл Қайырлықызы, «Жас Отан» жастар қанатының Астана қала­лық филиалының төрағасы Серғазы Шақабаев, Астана қаласының Жастар саясаты мәсе­лелері басқармасының бас­шысы Ербол Рыспаев, жас бизнесмен  Бақтияр Әшіров, «Жастар кадрлық резерві 2014» жобасына қатысушы Әлия Әділханқызы бар. Бұл күні сұхбаттасу кезеңінен сүрін­беген үміткерлер «Білім беру» кезеңіне өтті. Жобаның қорытынды нәтижелері (www.rezerv.kz) сайтында жарияланады. Ләйла ЕДІЛҚЫЗЫ, «Егемен Қазақстан»