Пан Ги Мун Оңтүстік Корея президенттігі үшін сайлауға түсуі мүмкін

БҰҰ Бас хатшысы қызметінен кетіп жатқан Пан Ги Мун келесі жылдың соңында өтетін Оңтүстік Корея президентінің сайлауында өз кандидатурасын ұсынуы мүмкіндігін жоққа шығармайды. Бұған қатысты шешімді 2016 жылдың соңында Біріккен Ұлттар Ұйымының бас хатшысы лауазымындағы мерзімі аяқталып, өз еліне оралғаннан кейін қабылдамақ, деп хабарлайды ҚазАқпарат Reuters  агенттігіне сілтеме жасап. «Кореяда (Оңтүстік) көптеген адам ел болашағын жақсы ету үшін өз кандидатурамды ұсынатынымды күтуде, мен оны сеземін», - деді ол. Пан Ги Мун Оңтүстік Кореяға қаңтар айының ортасында қайтатынын атап өтті. «Содан кейін Кореяның (Оңтүстік) болашағында қандай рөл ойнай алатыным жөнінде маған жақсы кеңес бере алатын достарыммен, құрмет тұтатын адамдарыммен ақылдасатын боламын.Барлық нұсқалар ашық күйінде қалуда», - деп қосты ол. Reuters-тің атап өтуінше, егер Пан Ги Мун президенттік кресло үшін сайлауға түсу шешімін қабылдаса, ол билік басындағы «Сэнури» партиясы атынан қатысатын болады. Оңтүстік Кореяда қыркүйек айында өткізілген сауалнамаға сәйкес, респонденттердің 32,7 пайызы Пан Ги Мун үшін дауыс беруге дайын. Оның  ізін ала 17,3% дауыспен оппозициялық саясаткер Мун Чжэ Ин мен 8,1% дауыспен Ан Чхоль Су келеді. Оңтүстік Кореяның бұрынғы сыртқы істер министрі Пан Ги Мун БҰҰ бас хатшысы қызметін 2007 жылдан бері атқарып келді.