"Алматы-2" вокзалы маңында ақылы автотұрақ ашылды

"Алматы-2" вокзалы маңында ақылы автотұрақ іске қосылды. Бұл туралы "Алматы арнайы паркинг қызметі" ЖШС баспасөз қызметі хабарлады. "Ол жерде бәрі реттелді. Адамдар ыңғайлы орынға тоқтай берсе болады. Қоғамдық көлік аялдамасында енді тұра алмайды. Біз тұрақтауға болмайтын жерді де сызып көрсеттік. Енді кептеліс болмауын қадағалаймыз. Қоғамдық көлікке арналған бөліктер бар, ол ақылы автотұрақ аумағына кірмейді", - дейді компания өкілдері. 322 орынға арналған жаңа ақылы автотұрақ Райымбек даңғылынан Тузов көшесіне дейін Абылайхан даңғылының бойымен, ары қарай Тузов көшесінен теміржол вокзалына дейінгі аумақты алып жатыр. Желтоқсан көшесіне дейінгі вокзал маңындағы жер де автотұраққа кірігіп, ол жерге төрт паркомат орнатылған. Автотұрақ үшін паркоматпен қатар, SMS хабарлама (Beeline және Activ), "Алматы автотұрақтары" арнайы қосымшасы және Qiwi терминалдары арқылы төлем жасауға болады.